Desiraturiko lehen postuak ihes egin badie ere, bukaera borobila
Bigarren izan da Pasaia Kayak Itsas Kayakeko Euskadiko Kopako azken proba puntuagarrian. Balantze baikorra egin dute, orobat, arduradunek.
Ioar Alonso eta Maialen Vitoria, igandean Lekeition jasotako sariarekin. 
Igandean jokatu zen Lekeition (Bizkaia) Itsas Kayakeko Euskadiko Kopako azken proba puntuagarria, eta “gogotik” saiatu zirela aitortu badute ere, Pasaia Kayakek ez zuen lortu Zumaiako Itxas-Gain taldeak ateratzen zien 33 puntuko aldea kentzea, eta bigarren postuarekin konformatu behar izan zuten azkenean. Meritu handikoa, dena den, postu hori ere.
Lehia estua espero zen Elantxobeko portutik Lekeitioko Isuntza hondartzarainoko ia 13 kilometroko ibilbidean, baina zumaiarrek ez zuten aukera alferrik galdu eta talde oso indartsua aurkeztu zuten, lehen postuari eusteko. Pasaitarrek, aldiz, hainbat baja garrantzitsu zituzten, eta gainera, senior kategorian garaipena lortzeko zuten kirolari indartsuenetako batek, Lander Rodriguezek, bertan behera utzi behar izan zuen lehia 3. kilometrora iritsi baino lehen, lemarekin urperatutako objektu bat jo ondoren.
Hori horrela ere, taldekideak txukun aritu ziren. Aipagarria, Iker Lizaso juniorraren lana, banakako 9. ontzi azkarrena izan baitzen, kategoria nagusietako hainbat palista ezagun gaindituz, 1h:02m:23 denborarekin. Itsas denboraldia “oso sasoi onean” bukatu duela esan dute prestatzaileek.
Xabi Crespo eta Iñigo Lois pasaitarrek osatutako K-2ak ere maila txukuna eman zuen, baina ezin izan zuen Donostiako Atletikoko ontzia gainditu, Lekeitiko badian bertan hartu baitzion aurrea azken metroetan, bi ontzien arteko buruz burukoan.
Eta ezin ahaztu daitezke, halaber, taldeko bi neska kadeteak. Maialen Vitoria eta Ioar Alonsok, bakoitzak bere mailan, hilabete hasieran jokatutako Espainiako Txapelketan egin zuten lan bikaina berretsi zuten. Ez zuten areriorik izan euren kategorian, baina beste goragoko mailetako hainbat kirolari gainditu zituzten, bien lanari balio handiagoa emanaz.
Azkenean, beteranoek lortutako puntuekin, bigarren izan zen probaren Euskal Koparako sailkapenean talde pasaitarra, 110 punturekin, Itxas-Gain garailearengandik 25 puntura, eta Barrikako taldearen aurretik. Hori horrela, bigarren da Pasaia Kayak sailkapen nagusian 575 punturekin, Itxas-Gain irabazlea baino 58 beherago; Donostiako Atletikok osatu du podiuma.
Balorazio oso baikorra egin dute, orobat, urdinen arduradunek itsas denboraldian lotutako emaitzen gainean. Aurten estreinakoz ekarri dituzte etxera haur eta kadete kategorietan dominak Euskadiko txapelketan. Orain, balantze orokorra egin eta, gehiegi lasaitu gabe, hurrengo denboraldia prestatzeari ekingo diote Trintxerpen.
