Nortasuna eta sexu-identitatea lantzen duen liburuarentzako crowfunding-a abiatu dute
1545 argitaletxea ekarpenen bila ari da 'Nor' izeneko proiektuarentzako. Irati Goikoetxeak idatziko du, eta Irrimarrak ilustratu.
Irrimarraren irudiek ilustratuko dute Irati Goikoetxearen testua. Oiartzungo 1545 argitaletxeak proiektu berri bat du esku artean. Nortasuna eta sexu-identitatea lantzen duen liburu ilustratu bat argitaratu nahi du, Nor izena jarri dioten proiektuarekin.
Testuaren egilea Irati Goikoetxea izango da. 2019an Igartza Saria irabazi zuen, Herriak ez du barkatuko eleberriarekin.
Irudiak, berriz, Irrimarraren ardura izango dira. Irene Irureta zumaiarrak eta Karmele Gorroño galdakoztarrak osatzen duten lan taldea da. Beraien webgunean ikus daitezke orain arte osatu dituzten lanak.
Epilogoa, berriz, Aingeru Mayor sexologoak idatziko du.
Liburua osatzeko, crowfunding kanpaina bat jarri dute martxan. Ekarpenak eginda, opariak jasotzeko aukera egongo dela jakinarazi du 1545 argitaletxeak. Proiektuaren Goteo-ko web orrialdean ikus daitezke zeintzuk diren opari horiek, egindako ekarpenaren araberakoa.
Eleberri ilustratuaren nondik norakoak azaltzeko bideo bat ere prestatu dute.
