Liburuen bitartez haur eta nerabeen eskubideen alde egingo dute
Tratu onak eta irakurzaletasuna sustatu nahi dituzte. Horretarako, ipuin kontalaria, tailerrak eta motxila berezi bat prestatu dituzte.
Pasaiako haurren artean tratu ona eta irakurzaletasuna sustatzeko helburuz, bi jarduera antolatu dituzte udaletik: ipuin kontalaria eta tailerrak; eta Kresala motxila izeneko egitasmoa.
Pasaiako Liburutegiek, Haur eta Nerabeen Eskubideen Sailak, Migrazio eta Aniztasun Arloak, Berdintasun Arloak eta Haur, Nerabe eta Gazteen Sustapen Sailak elkarlanean antolatu dituzte aipaturikoak.
Ipuin kontalaria eta tailerrak, San Pedron
Datorren asteazkenean, 17:30ean, San Pedroko udal liburutegian aniztasuna ardatz duten 100 liburu inguruko bilduma jarriko dute eskuragai. Bertan, besteak beste, familia aniztasuna, sexu-orientazioa, arraza, gaitasunak, eta genero estereotipoak hausten dituzten ereduak sustatzen dituzten hainbat liburu egongo dira.
Ondoren, Mireia Delgado Exposito ipuin kontalariaren eskutik, Hitzak josten ipuin kontaketarekin gozatua hartu ahalko dute txikiek. Azkenik, haurrentzako tailerrak egongo dira.
Kresala motxila
Saiakera aberasteko, haurren eskubideekin eta tratu onarekin lotura duten liburuz betetako bina Kresala motxila utziko dituzte Pasaiako lau udal liburutegietan. Idatzi horiek aldatzen joango dira garai bakoitzean landu nahi den gaiaren arabera.
Saiakerari hasiera emateko, aniztasuna ardatz duten liburuek osatuko dute Kresala motxila. Familia aniztasuna, sexu-orientazioa, arraza eta halako gaiak ardatz dituzten liburuak etxera eraman ahal izango dituzte gazteek horrela, eta hiru astez eduki ahalko dituzte etxean.
