Azoka eta moda pasarela izango da Koldo Mitxelena larunbatean
Merkataritza Festa jasoko du ikastetxearen patioak, Errenkoalderen egitasmoz. Goizean azoka egingo dute eta arratsaldean berriz, moda desfilea.
Errenkoaldek antolatutako stock azokako irudi bat Biteri Txiki kalean. Larunbata (hilak 8) ospakizun eguna izango da herriko merkatarientzat, Errenkoaldek Merkataritzaren Festa antolatu baitu udalarekin elkarlanean. Koldo Mitxelena ikastetxearen patioak jasoko du festa, goiz zein arratsaldez.
10:30etik 13:30era merkatariek beraien establezimenduetako produktuak eskainiko dituzte bertan, azoka batekin. Bitarte horretan umeentzako tailerra ere egongo da, eta goiza girotzeko musika ere izango dela aurreratu du Errenkoaldek. Ondorengo merkatariek parte hartuko dute: Ayele, Boutique Amelie, Calzados Koro, Casamayor, Diskparate, El Saltarin, Estetica Anne, Iris Jeronimo Estetica, La Coquine, Lirain, Love & Paradise, Kalima, Naiz, Rosmi, Tejidos Ami eta TM Diseño.
Arratsaldean berriz, 19:30ean hain zuzen, Koldo Mitxelenako patioa desfilatzeko pista bilakatuko da. Bertan, herriko merkatariek udazken-neguko modaren erakustaldia egingo dute, honakoek: Ayele, Amelie, Blond Kolor, Calzados Koro, Casamayor, La Coquine, Kalima, Love & Paradise, Paris Mertzeria eta Tejidos Ami. Monica Garciak aurkeztuko du desfilea, eta ekitaldiaren antolaketarako Teresa Tejedo dantzariaren laguntza jaso dute. Bisita sorpresa bat ere egongo dela aurreratu dute antolatzaileek.
