[Galeria] Zita erromantiko bat euskararekin
Azaroaren 18tik abenduaren 2ra bitarte ekingo zaio aurtengo Euskaraldiari. Antzerki bidez eman dute hitzordu horren berri, San Pedron.
Enara Fernandes, 'euskara' interpretatzen, joan den ostiraleko aurkezpen ekitaldian. Inguruan, Aleka taldeko antzezleak. 
Joan den ostiral iluntzean Pasaiako 2022ko Euskaraldiaren aurkezpena egin zuten, San Pedroko lonjako plaza berrian. Ohiko informazio ekitaldi bat egin beharrean, ordea, antzerki bidez kontatu zuten badatorrela, ate-joka dagoela, aurtengo Euskaraldia. Azaroaren 18an hasi eta abenduaren 2ra arte iraungo du ariketak.
Neska gazte batek zita erromantiko bat dauka. Hori izan zen emanaldiaren abiapuntua. Urduri zegoen, ez zekien nola jantzi, zein rol hartu, zer esan, nola jokatu. Hori gutxi balitz, buruhausteak are korapilatsuago bihurtu zizkion pertsonaia batekin egin zuen topo oholtzan: bere kontzientzia. Bi protagonista horiek, hurrenez hurren, Maddi Ursua eta Enara Fernandes izan ziren; Aleka antzerki talde sanpedrotarreko emakumeak ere oholtzan izan ziren.
Antzezleen istorioari adi jarraiki, bukaerara arte ez zuten jakin ikusleek zita erromantiko hori euskararekin, ez beste inorekin, zuela Maddik. Hitzordu hori bera izango dute bertaratutakoek ere, datorren hilabete bukaeratik hasi eta hamabost egunez, Euskaraldiarekin. Horra hor ostiralekoak San Pedron sorturiko giroaren zenbait argazki:
