Cadizko inauteriak umorez eta kolorez beteko du herria
Zortzigarren Cadizko Inauteriak herria hartuko du asteburu honetan. Emanaldi nagusia larunbatean izan arren, igandean herriko kaleetatik ibiliko dira txirigotak.
Gaurko agerraldiko irudia. Asteburu honetan umorez eta kolorez beteko da herria, VIII. Cadizko Inauteri Jaialdiak hartuko baitu Errenteria-Orereta. Gaur bertan aurkeztu dute asteburukoa Niessen elkartean. Bertan izan da, elkartekoekin batera, Jose Antonio Txuekarro ‘Txusko’ antolatzailea.”Hemen ere intentsitate askorekin bizitzen da Cadizko inauteria, jarraitzaile asko ditu”, esan du. Eta halaxe dela erakutsi dute herritarrek, larunbaterako aurreikusitako ekitaldi nagusirako sarrera guztiak (450dik gora) saldu baitituzte jada. Ez da lekurik geratzen.
Emanaldi nagusi hori Lekuona Fabrikak jasoko du, hainbat txirigota eta konpartsek emanaldi bana eskainiko dute 19:00etatik aurrera. ‘Los ultraortodoxos de los callejones cardoso’, ‘We can do… Carnaval!’, ‘Despues de Cadiz, ni hablar’, ‘Coristas, a la calle’ eta ‘Este año salgo de milagri’ izeneko konpartsak igoko dira oholtzara. Cadizko inauterietan saritutakoak izango dira guztiak.
Sarrerarik gabe geratu arren, herritar guztiek gozatu ahal izango dute festaz. Izan ere, igandean (hilak 16) herriko kaleetan barrena ibiliko dira txirigota eta konpartsak.
Asteburuko eskaintza biribiltzeko gonbidatu berezi bat ekarriko dute herrira. Hala, motorrak berotzen joateko asmoz, ostegunean (hilak 13) berdintasunean eta indarkeria matxistaren prebentzioan aditua den Ana Magallenesek hitzaldi berezia eskainiko du Emakumeen Etxean. “Emakume honek, inauteriak intentsitate handiarekin gozatzeaz gainera, eskola eta unibertsitateetan hitzaldiak eskaintzen ditu. Saioa bukatzean Ana klitoriz mozorrotuko da, izugarria izango da”, aurreratu du Txuekarrok. ‘Emakumea, feminismoa eta inauteria izeneko saioa eskainiko du 18:00etan. 19:30ean berriz, umore saio bat eskainiko dute, Cadizeko erromantzearekin.
Eskuorri berezi bat banatuko dute asteburu honetan antolatzaileek. Honetan, konpartsek abestuko dituzten kanten letrak irakur daitezke, euskaraz ere.
Hondarribian ere
Larunbateko ekitaldirako sarrera guztiak bukatu direnez, beste saio bat antolatu dutela jakinarazi dute gaurko agerraldian, Hondarribian hain zuzen. Ostiralean (hilak 14) izango da, Itsas Etxea auditoriumean, 20:00etan.
