Lezon, 2023ko zerga guztiek eta tasa gehienek ez dute igoerarik izango
Gobernu taldeko kideek atera dute aurrera, udalbatzarrean, proposamena. Jendaurrean dago hartutako neurrien agiria.
Jesus Mari Martiarena alkatea (EAJ) eta Joxean Sanchez gobernukidea (PSE-EE). Lezoko Udalak, udalbatzarrean hala onartuta, 2023 urteari begira ez ditu udal zergak igoko, eta tasa gehienek ere bere horretan jarraituko dute. Azken zortzi urtean hala izan da. Erabakia iraileko udalbatzarrean hartu zuten udal hautetsiek, gobernu taldeko alderdien (EAJ eta PSE-EE) babesarekin.
Bestalde, udalak adierazi du zerga-onurak eta hobariak mantenduko dituela, baita zergak ordaintzeko erraztasunak eman ere. Horren harria, udal erakundeak zehaztu du teilatuen eta fatxaden birgaitze energetikoko lanetarako, dagokion zergaren %50eko hobaria eska daitekeela.
Orain, 2023rako onartutako zerga eta tasen proposamena jendaurrean izango da 30 egunez, nahi duenak alegazioak egin ditzan.
“Argi genuen zergak eta tasak izoztu egin behar zirela, egungo egoera ekonomikoa dela eta. Erakundeok egoera hau arintzeko neurriak hartu behar ditugu, eta guk bereziki familia lezoarrak babestu behar ditugu”, adierazi du Jesus Mari Martiarena (EAJ) alkateak. Gobernukide Joxean Sanchezek (PSE-EE), bere aldetik neurri horiek familiei lasaitasuna emango dietela nabarmendu du, “inflazioa arazo larria bihurtu baita, batez ere, errenta txikientzat”. Lezoko familiei zergen igoeraren presioa arintzea horien onurarako izango dela esan du Sanchezek, “gure herriko familia, enpresa eta negozioak gehiago ez zergapetzeko”. Sozialistak erantsi du, zergetan igoerarik izan ez arren, “zerbitzu, publikoen kalitatea” mantenduko dela, eta “kaudimen ekonomiko handiarekin, erronka eta helburu berriei” aurre egin ahal izango zaiela, “udalak egun ez duelako inolako zorrik inorekin”.
