Mintzalaguna egitasmoaren ikasturteko eskaintza aurkeztu dute
Talde dinamiketan sakontzeaz gain, Lau Haizetara elkarteak bere kabuz irakurketa errazeko saioak antolatuko ditu aurten lehenengoz.
Lau Haizetara elkarteak 2022-2023 ikasturterako mintzalaguna egitasmoa aurkeztu du, hogeita bigarrenez. Antolatzaileek aurtengo ekitaldiak berezitasun puntu bat izango duela adierazi dute, Euskaraldia ere antolatuko delako. Aurtengo ikasturtea ekainera arte luzatuko dute.
Batetik, talde dinamikak egingo dituzte: 3-4 laguneko taldeak osatu, dinamizazio lanetarako mintzalaguntzaile bat esleitu, eta herritarrei euskaraz ahoz aritzeko erraztasunak eskainiko dituzte. Mintzalaguntzaileak euskaldun zaharra behar du izan, eta funtzio horretarako kide bila dabiltzala azaldu dute elkarteko kideek. Bestetik, berrikuntza gisa eta udal liburutegiarekin elkarlanean, irakurketa errazeko saioak egingo dituzte, non idatzizko obra errazak, ez mardulak irakurriko dituzten taldean. Horrela, jarioaz gain, euskaraz irakurtzeko gaitasunetan ere trebatzeko aukera izango dute parte-hartzaileek. Aurten lehenengoz antolatuko ditu Lau Haizetara elkarteak bere kabuz irakurketa errazeko saioak, baina aurreko hiruetan elkarlanean antolatu dituzte udalarekin batera.
Antolatzaileek, ez dela ekimen itxi bat azpimarratu nahi izan dute: “Askotan, jendeak euskaltegietako ikasleei mugatutako eskaintza dela uste du; baina bilobekin aritzeko ohitura berreskuratu nahi duten euskaldun zaharrek edo jarioa hobetu nahi duten euskara ikasleek ateak irekita dituzte”.
Errenteria-Oreretako saioek AEK, Errenteriako Udal Euskaltegia, eta udalaren babesa jasoko dute. Izena emateko kanpaina urtarrilean abiatuko da, ikasturtean zehar izena emateko aukera egongo bada ere. Lau Haizetara elkartearen egoitzara hurbildu behar da, edota Internet bidez egin daiteke, esteka honetan. Erabat doakoa izango da parte hartzea.
Duela ia 30 urte antolatu zen lehen aldiz mintzalagun talde bat Euskal Herrian. Donostin izan zen hura, 1993an. Ordutik, Euskal Herriko txoko ezberdinetara zabaldu dira praktika hauek, eta gaur egun urtero 7.000 lagun inguruk parte hartzen dute. Hona hemen Mintzalagunaren webgune nagusia.
