Tiroz jotako beste belatz handi bat topatu dute Jaizkibelen
Ehiztari baten tiroagatik, bizirik baina hegal bat kaltetuta topatu dute hegaztia. Eguzkik Ingurumen Fiskaltzara eramango du auzia.
Belatz handia, hegala zaurituta. [Argazkia: @etxega]. 
Tiroz jotako belatz handi bat topatu zuten joan den asteburuan Jaizkibel mendian. Horren berri eman du Twitterren @etxega erabiltzaileak, eta berehala egin dute ageriko euren haserrea beste zenbait txiolariek ere, ez baita lehen aldia. Eguzkik Ingurumen Fiskaltzara eramango du auzia.
Hegaztia bizirik bazegoen ere, hegan egin ezinean topatu zuten hura zenbait mendizalek. Talde ekologistak eman duen informazioaren arabera, belatza, zaurituta, Arizmendiko Basa Fauna Berreskuratzeko Zentrora eraman dute, Urnietara.
Aurreko ehiza denboraldian Igeldoko Arrano Etxera tiroz botatako 33 hegazti iritsi ziren
Orain dela urtebete, hain justu, beste belatz handi bat bota zuten Jaizkibelen. Horren ondorioz, Foru Aldundiak hainbat ehiza postu itxiarazi zituen bolada batez; kasu honen aurrean aginte organoak neurri bera hartuko duela uste du talde ekologistak.
Baina hori ez da nahikoa. Legez babestutako hegaztiak tiroz botatzea noizean behingo zerbait ez dela esan du Eguzkik; kontrara, arazo “kronikoa” dela gaitzetsi dute. Iaz jakin zuten aurreko ehiza denboraldian Igeldoko Arrano Etxera tiroz botatako 33 hegazti iritsi zirela, horietako 21, espezie babestu edo ez-zinegetikoetako aleak.
Zifra hori “icebergaren tontorra” besterik ez dela dio erakundeak, sinetsita baitaude tiroz botatako beste zenbait hegazti jasoko zituztela botatzaileek berek, eta beste hainbat sasi artean-edo galduko zirela. “Horrelako gertaeren berri izaten dugu soil-soilik botatako hegazti bat aurkitzen duenak publiko egiten duenean edo jakinarazten digunean”, azaldu dute Eguzkitik.
Artikulu honetako argazki guztiak @etxega erabiltzailearenak dira.
