Isaac Palencia: "Aldaketa garaia da Errenterian"
Gaur aurkeztu dute ofizialki Isaac Palencia PSE-EEren alkategai bezala. Herri bezala "gehiago merezi dugula" uste du, eta horregatik, esku artean proiektu "berritu eta anbizio handikoa" duela esan du.
Gaur aurkeztu dute ofizialki Isaac Palencia PSE-EEren alkategai bezala, Touring etorbidean egindako agerraldi batean. Harekin batera Jose Ignacio Asensio Gipuzkoako PSE-EEren idazkari nagusia izan da.
Lehenik eta behin, Palenciak esan du “ohore handia” dela alkategai izatea, baina baita ere “ardura handia”. Ilusioz eta anbizioz hartu du lekukoa errenteriarrak, “alkatetza berreskuratu eta herritarren bizi baldintzak hobetzeko” asmoz. EH Bilduren aurrean “alternatiba bakarra” direla erantsi du.
“Gure herriarekin konprometitutako pertsona naiz. Agustinetan hazitakoa, Tellerin ikastitakoa, eta Touring taldean aritutakoa. Bizitza osoa hemen pasatu dut”, esan du. “Herritar askok esan didaten bezala, inoiz baino beharrezkoagoa da herriak EH Bildu eta alkatearen aldetik pairatzen duen utzikeria aldatzea”. Herri bezala “gehiago merezi dugula” uste du Palenciak, eta horregatik, esku artean proiektu “berritu eta anbizio handikoa” duela esan du, “Errenteria hobeago bat lortzeko bideratutakoa”.
Urte luzez Errenteria-Orereta “erreferentzia” izan dela erantsi du, Jose Maria Gurrutxaga, Miguel Buen, Adrian Lopez eta Juan Carlos Merino alkateen lana txalotu eta gogorarazi du. “EH Bilduren ez den beste alternatiba bat posible da”.
Egun herriak “arazo larriak” dituela erantsi du, bereziki mugikortasunari lotutakoak, eta “neurri azkar eta ausartak” behar direla uste du. EH Bildu “herriak aurrera egin dezan oztopo” dela ere esan du. “EH Bilduk gure proposamenak baztertu eta gutxietsi ditu, ikertu gabe onak ala txarrak ziren”. Kudeaketa txar horren hainbat adibide jarri ditu: Beraungo Kultur Zentroaren zazpi urteko atzerapena, Lekuonaren “atzerapena eta gain kostua”, San Markos gotorlekuko instalakuntza eta zerbitzuen egoera, kiroldegien “kudeaketa txarra”, Ludoteka eta Gaztelekuen kudeaketa edota herriko gazteei bideratutako etxeak “erdi hutsik” daudela. Hauei lotuta, Barandiarango parkea, Gaztainoko igogailua, Iztietako “eremu degradratua” edo Gabierrotako paseoa ere aipatu ditu kudeaketa txarraren adibide gisa.
“Aldaketa garaia da Errenterian”, horrekin ziur dago Palencia, “garai berri baten aurrean gaudela, inoiz baino beharrezkoagoa baita egoera hori aldatzea”. Herritarren batasuna ezinbestekotzat jo du sozialistak, “Errenteriak behar duen aldaketa hori lortzeko”.
Aurrerakoi sentitzen diren herritarrei dei egin die Palenciak, hari botoa emateko: “Sozialistek taldea dugu, esperientzia, ideiak ditugu eta anbizioa berriro ere udalerri honen buru izateko, eta merezi duen lekura eramateko”.
