Orereta Ikastola, Gau Beltzerako prest
Hilaren 31n Gau Beltza egingo du Orereta Ikastolak, hirugarrenez. Lehendakari Agirre plazan emanaldi berezia eskainiko dute, denetik izango da.
Hirugarrenez, Gau Beltza antolatu du hilaren 31ko ilunabarrerako Orereta Ikastolak. Lau Haizetara, Amulleta danbor kofradia, Ereintza dantza taldea, Herri Arte Eskola, Urdaburu Mendizale elkartea, Kontari abesbatza eta Zituene eragileekin batera ondu dute egitaraua.
19:30ean hasiko dira, Kalabazaren Bidearekin. Santa Klara kaletik abiatuta, herriko hainbat kale eta plazetan barrena ibiliko dira, Lehendakari Agirre plazan helduko da “sorpresa” ikastolakoen arabera. Kalabazaren gurdiarekin, Kuiandererekin, trikimako gaineko orekariekin, dantzan zein musikaz eta kriseilu nahiz lastargien argipean bilduko dira plazan, mozorrotuta. Uzta garaia agurtu eta neguan sartzeko ekitaldia berezia izango dela aurreratu dute. Ikuskizunaren ondoren, suzko zezenarekin, Beldurren Eltzean izuak errez eta kalabaza pastelak janez bukatuko dute festa.
Etxeko trapu eta arropa zaharrarekin mozorrotzeko deia egin dute ikastolakoek, baita etxea eta ingurua apaintzekoa ere. Etxean egindako kalabaza pastelak 19:00etan jasoko dituzte Lehendakari Agirre plazan.
“Gau Beltzak herriarentzako festa izan nahi du eta hala desio duen herritar oro dago bertan parte hartzera gonbidatuta”, diote ikastolako iturriek.
Mikro ipuin eta ikus-entzunezkoen lehiaketa
IV. Beldurrezko mikro ipuin eta ikus-entzunezkoen lehiaketa antolatu dute Gau Beltza eta Euskararen Eguna lotzeko asmoz. Herriko DBHko ikasleek eta 16 urtetik gorako beste edozein herritarrek parte hartu ahalko dute. Abenduaren 2ra arte bidali daitezke lanak, abenduaren 21an jakinaraziko dituzte irabazleak. Oinarriak eta xehetasun guztiak hemen kontsulta daitezke.
