150etik gora oiartzuarrek erantzun dute Zaintzadiren galdetegia
Bakardade ez hautatuaren diagnosia egiteko bidali zuten galdetegia. Orain, jasotako erantzunak aztertuko dituzte dinamizatzaileek.
Zaintzadiko dinamizatzaileak, Olaia Lasa (ezkerrean) Gizarte-Ongizate zinegotziarekin. Oiartzungo Udalak Zaintzadi egitasmoa martxan jarri du, hautatua ez den bakardadean dauden pertsonen beharrei erantzuteko.
70 galderako galdetegi bat prestatu zuten Zaintzadiko teknikariek, eta horri 150 lagunek erantzun diote. Herrian dauden baliabideak ezagutzea izan da helburua.
Galdetegia erantzun dutenen artean, gehienak online izan dira —85—. Bihar arte dago modu horretan egiteko aukera, esteka honetan klik eginda. Beste 70ek paperean erantzun dute; gehienak auzoetako botiketan, okindegian eta arrandegiko banaketa furgonetan jaso ditu udalak.
Udalak erantzuna eman dutenei eskerrak eman dizkie. “Beraien iritzia eta ekarpena garrantzitsua izango da herriko errealitatea hobeto ezagutu eta hurrengo pausoak zehazteko”, azaldu dute.
Zaintzadiko dinamizatzaileek erantzunak jaso eta aztertuko dituzte orain, herriko diagnosia osatzeko. Azaroa amaieran, emaitzak eta proiektuaren hurrengo faseak aurkezteko batzar irekia egingo dutela iragarri dute.
