Alaia Martin finalerdietako bigarren itzulian izango da
Elizondoko saioa irabazi du bertsolari oiartzuarrak. Zuzenean sailkatu da Amurrioko finalerdiko saiorako; azaroaren 19an izango da.
Martinek saio biribila egin zuen Baztan pilotalekuan [Arg.: Bertsozale Elkartea]. Bertsolari Txapelketa Nagusiko finalerdietako lehen itzuliko aurreneko saioa jokatu zuten atzo arratsaldean, Elizondon.
1.400 ikus-entzulek bete zuten Baztan pilotalekua, Alaia Martin Etxebeste oiartzuarrak puntu gehien nola biltzen zituen ikusteko.
Modu horretan, finalerdietako bigarren itzulira sailkatu da zuzenean. Amurrion jarriko da mikrofonoaren aurrean, azaroaren 19an. Itzuliko hiru finalerdietako bat izango da Arabako herrikoa; oholtzara igoko diren beste bostak joaneko beste hiru saioetan erabakiko dira.
729,5 puntu bildu zituen Ugaldetxokoak, Joanes Illarregik baino 18,5 gehiago. Atzetik geratu ziren Agin Laburu, Unai Agirre, Onintza Enbeita eta Iñaki Apalategi.
Saioa hasteko, binaka aritu ziren zortziko handian eta txikian lehenengo. Gero, berriz, puntuka egin zutenzortzi bertso osatu arte eta seiko motzean hiruna bertso bota zituzten. Azkenean, ganbarako lana egin zuen seikoteak, Amaia Castorenek jarritako gai honi erantzunez: “Eskua hartu dizu. Indartsuago sentitu zara”.
Miren Mujika Telleriak saioko kronika idatzi du Berria egunkarirako.
