Hamar urteko ibilbidea ospatuko du Oarsomusikak azaroaren 26an
Lendakaris Muertos, The Guilty Brigade, Larru Beltzak eta Trilita taldeek kontzertu bana eskainiko dute Lekuonan. Sarrerak dagoeneko eskura daitezke, 10 euroan.
Lendakaris Muertos taldearen irudi bat. Oarsomusika elkarteak hamar urteko beteko ditu aurten, eta urteurren biribila behar bezala ospatzeko jaialdi berezia antolatu dute azaroaren 26rako. Aurretik, 16anean hain zuzen, kartel eta argazki erakusketa inauguratuko dute Xenpelar aretoan, pikoteo eta guzti. 20:00etan berriz, Andoni Ollokiegik emanaldi akustikoa eskainiko du.
Hilaren 26ko egun handia 19:00etan hasiko dute, Lekuona Fabrikak jasoko du jaialdia. Lendakaris Muertos, The Guilty Brigade, Larru Beltzak eta Trilita taldeak igoko dira oholtzara. Musika saioak bukatzean, Arkaitza tabernara mugituko dute festa.
Sarrerak dagoeneko eskura daitezke, 10 euroren truke, lotura honetan.
200dik gora kontzertu
Duela hamar urte herriko hainbat gaztek sortu zuten Oarsomusika elkartea, “musika emanaldi falta pixka bat betetzeko” asmoz. Eta ordutik, etengabe askotariko musika saioak antolatu dituzte, 200dik gora talde ekarri dituzte Errenteria-Oreretara: Narco, Zea Mays, Joseba Tapia, Grises, Guadalupe Plata, Anari, Señor No, Willis Drummond, Ofunkillo, Su Ta Gar, Rotten XIII, Dinero, Lie Detectors eta Porco Bravo, besteak beste.
