Oiartzungo Kirol Saria, Koldo Fernandezentzat
Oiartzun Kirol Elkartean zentzuz eta arimaz lanean ibilitakoarentzat izango da aitortza saria. Haren senideek jasoko dute, ostiraleko ekitaldian.
Koldo Fernandez. Argazkia: Gorka Rubio / Argazki Press Aitortzarako izango da aurtengo Oiartzungo Kirol Saria, Koldo Fernandezen herriko kirolaren alde, beraz, herriaren alde egindako lan oparoa aitortzeko. Kirol Aholku Batzordeak erabaki du Fernandezentzat izatea saria; bertan, herriko kirol elkarteetako ordezkariak eta udala daude ordezkatuta. Ostiraleko 19:00etan udaletxean egingo den ekitaldian emango diete haren etxekoei merezitako oroitzapen eta aitortza saria.
Otsailean hil zen Oiartzun Kirol Elkarteko lehendakaria. Toki batean edo bestean, berrogei urtetik gora egin zituen herriko futbol elkartearen aldeko zeregin geldiezinean, hastapena 1977-1978 sasoian izan zelarik, orduko hartan hasi zelako entrenatzaile bezala klubean, Haur Mailako mutilen taldea gidatzen zehazki.
Oiartzungo Kirol Astearen barruan eman ohi da herriko kirolean era batera edo bestera nabarmendu direnak goresteko aipamena, 2016tik. Saria jasotzeko balizko hautagaiak biltzeko prozesua publikoa izan da aurten ere, eta orotara, 21 proposamen jaso dituztela jakinarazi du Kirol Aholku Batzordeak. Fernandez hobetsi du batzorde horrek.
