Andonaegiko etxeak birgaitzeko diru laguntzak, aurrera
Guztira 30 bizilagun erkidegok eskatu ahal izango dute euren bizitokiak eraberritzeko finantziazioa. Bi hilabeteko epea dute trintxerpetarrek.
Andonaegi kaleko argazkia. Hori da jarduketa eremuak barne hartutako bost kaleetako bat. 
Atzo arratsaldean hileroko plenoa egin zuen Pasaiako udalbatzak, eta orduko horretan, besteak beste, zinegotzi guztiek aho batez onartu zituzten Trintxerpeko Andonaegi auzoko eraikinak birgaitzeko diru laguntzen oinarriak. Guztira 30 atarik eskatu ahal izango dute finantziazioa.
Planaren guztizko zuzkidura ia 7,3 milioi eurokoa da, Eusko Jaurlaritzako Lurralde Politika, Etxebizitza eta Garraio Sailak sustaturikoa. Diru hori euren eraikinetan birgaitze obrak egin nahi dituzten jabe-erkidegoek baliatu ahalko dute.
Kasu honetan, jarduketa eremuak Trintxerpeko 30 atari hartu ditu barne, honako kale hauetakoak: Bidasoa, Igeldo, Oiartzun, Andonaegi eta Urgull. Kontuan hartu beharko da, dena dela, laguntzen hartzaileak jabe erkidegoak izango direla, eta ez, ordea, norbanakoak.
Obra motak eta epeak
Diru partida horretan aurreikusiriko lanak honakoak izango dira: etxebizitzen irisgarritasuna bermatzeko obrak, eraginkortasun energetikoa hobetzeko obrak, saneamenduko instalazioak arauetara egokitzeko obrak, EITan adierazitako bizigarritasuna egokitzeko edo egitura eta eraikuntza egokitzeko obrak.
Interesa duten bizilagunek bi hilabeteko epea dute laguntza programan sartzeko akordioa aurkezteko. Une horretatik aurrera, hiru aurrekontu eskatu beharko dituzte hilabeteko epean proiektua egiteko; beste hilabete bat izango dute esleipena proposatzeko, eta beste hilabete bat hori berresteko. Behin urrats horiek egin ondoren, zortzi hilabeteko epea zabalduko da, erkidegoek laguntza-eskaera eta obra-lizentzia eskaera aurkez ditzaten. Hamahiru hilabete, guztira.
Laguntzak obrak egin ahala ordainduko dira, eta lanek 2025eko apirilerako bukatuta egon behar dute.
Informazio bulegoa
Izapideak erraztearren, udalak informazio bulego bat egokitu du Andonaegi jauregiko guarda-etxea izandakoan. Bulegoan teknikariak izango dira jabe erkidegoei eraikin bakoitzaren birgaitze proiektuekin zerikusia duen guztiari buruzko aholkuak emateko.
Informazioa nahi dutenek 943 00 05 telefono zenbakira WhatsAppa bidali edo dei dezakete.
