Donostiako Orfeoia arituko da Oiartzunen, Azkue Memorialean
Oiartzungo Organozaleak elkarteak hurrengo astebururako hiru kontzertu programatu ditu, Irunen, Errenteria-Oreretan eta Oiartzunen.
Donostiako Orfeoiak azaroaren 6an kantatuko du. Oiartzungo Organozaleak elkarteak Jose Manuel Azkueren omenezko memoriala antolatu du, bederatzigarren aldiz. Oiartzunen jaio zen organojolearen memoria betikotzeko urteroko ariketan hiru kontzertu antolatu dituzte.
Azkuek lotura berezia izan zuen Irun eta Errenteria-Oreretarekin, besteak beste. Bidasoko hiriko Junkaleko Andra Mariko organoa gogoko zuen, baita Oarsoaldeko hiriko Agustinetako elizako organo txikia ere.
Horregatik, kontzertua jaioterrian antolatzeaz gain, bi udalerri horietan saio bana egingo dituzte. Oiartzunen, gainera, Donostiako Orfeoia ikusteko aukera egongo da.
Hiru saioetan musikariekin solasean aritzeko aukera egongo da, kontzertuak programatuta dauden ordua baino ordu erdi lehenago hasita.
Egitaraua
- Azaroaren 4an, ostirala: J. Verdin /M.N. Bette (organoa). H.Ezeiza (dultzaina, txistua). B. Carrera (dultzaina, oboea). 19:30ean, Errenteria-Oreretako Agustinetako komentuan.
- Azaroaren 5ean, larunbata: J. Verdin (organoa). Irungo Junkaleko Andra Mariaren elizan, 19:00etan.
- Azaroaren 6an, igandea: J.Verdin (harmoniuma). M.N. Bette (pianoa). Donostiako orfeoia (zuz: S. Alfaro). 18:30ean, Oiartzungo Done Eztebe parrokian.
Jose Manuel Azkue
Jose Manuel Azkue 1927an jaio zen, Killirikupe gaineko Aginalgalde-Etxean. Sei urterekin eman zuen izena Donostiako Musika Kontserbatorioan. 11 urterekin Alesbesera (Nafarroa) joan zen fraide ikasketak egitera, eta urtebete beranduago hasi zen mezetan jotzen.
Hainbat urtez komentuz komentu ibili zen, organista moduan. Hogei urterekin apaiz izateko erabaki behar zuenean, atzera egin zuen. Irunen eta Donostian ibili zen organista moduan. 1954an AEBtara joan zen, eta bi hamarkada eman zituen bertan, organoa ogibide izaten.
1975ean Euskal Herrira bueltatu zen, Donostiako Koruko Andre Mariaren parrokian organista postua lortuta. Donostian eta mundu guztian zehar eman zituen kontzertuak. 2008an hil zen.
