Auzoen arteko desafioa egingo dute larunbatean
Ergoiengo Auzokalte elkartean eta inguruetan probak eta jolasak egingo dituzte herriko zortzi auzoetako ordezkariz osatutako taldeek.
Oiartzungo auzoen arteko desafioa egingo dute datorren larunbatean, hilak 5. 2019ko urrian egin zen Poza Festan ardura hartuta, Ergoiengo taldeak antolatuko du desafiyua.
“Berriz ere auzoen arteko desafio formatua berreskuratze aldera, auzoan bertan ospatuko dugu”, azaldu dute antolatzaileek. Argi utzi dute Poza Festako lehiarekin alderatuta, “apalagoa” izango dela.
Herriko zortzi auzoek izango dute ordezkaritza, eta bakoitzetik dozena bat lagunek hartuko dute parte. Hainbat jolasetan parte hartuko dute, baina ez dira denak herri kirolekin lotutakoak izango.
Ez dute zehaztasun handirik eman nahi izan, “sorpresa” izango direlako, baina esan dute proba horiek fisikoak zein buruarekin egin beharrekoak izango direla. Baita gastronomikoa ere: bazkalduko duten paella kozinatzea izango da jolasetako bat.
Egitaraua
- 10:30ean: Topaketa.
- 11:00etan: Proben hasiera.
- 14:00etan: Bazkaria, parte hartzaileentzat. Bazkaldu ondoren, girotzea.
