Mikel Arruti Salaberria, EH Bilduren alkategaia
Koalizioaren proposamena berretsi egin dute herriko bilkideek. "Nigan jarri duten konfiantza eskertu nahi nuke", esan du Arrutik.
Lezoko EH Bilduren mahai politikoak Mikel Arruti Salaberria aurkeztu zuen 2023ko udal hauteskundeetan koalizioaren zerrendaburu izateko. Herriko bilkideek, proposamena berresteko bozketan, mahai politikoaren proposamena onetsi dute aho batez. Beraz, behin betiko erabakia da Arruti izango dela EH Bilduren alkategaia hurrengo urteko udal hauteskundeetarako. Berreste batzarrean, Lezoko EH Bilduko kideen %60k parte hartu zuen. “Lezoko EH Bilduren oinarriek berriro alkategai izateko nigan jarri duten konfiantza eskertu nahi nuke. Ilusioz eta erantzukizunez jaso dute Lezoko alkategai izateko ardura”, adierazi du Arrutik
Lezokoa eta 1977an jaioa, 2019ko udal hauteskundeetan ere zerrendaburu izan zuen koalizioak Arruti. Orduko hartan boto gehien jaso zituen alderdia izan zen, 1.418rekin (%46,7), sei hautetsi eskuratuz. EAJren hautagaitza izen zen 2019an bigarren bozkatuena, 100 boto pasara, sei zinegotzi ere lortuz. Jeltzaleek eta PSE-EEk (zinegotzi bat eskuratu zuten) egindako akordioari esker, haiek eskuratu zuten alkatetza.
Arrutiren arabera, datozen urteetarako “erronka handiak” izango ditu Lezok. Horiei erantzuna emateko hiru ardatzetan oinarrituko du EH Bilduk bere egiteko modua: “Osatzen ari garen zinegotzi lantaldean, Lezorako aurkeztuko dugun proiektuan, eta Lezok behar duen udala eta herritarren arteko gidaritza partekatuan”.
