Hirutik hiru saio irabazita, Martinek hanka eta erdi du finalean
Amurrioko saioan nagusitu da oiartzuarra. Abenduaren 3ko saioko puntuaketa jakin arte itxaron beharko du, baina gertu du sailkapena.
Alaia Martin, Amurrioko saioan [Arg.: Gari Garaialde - Xenpelar Dokumentazio Zentroa]. Sekulako txapelketa egiten ari da Alaia Martin Etxebeste. Bertsolaritza Txapelketa Nagusian hiru saio jokatu, eta hiruretan agertu dira bere izen-abizenak sailkapeneko lehenengo postuan.
Finalerdietako itzuliko saioa jokatu zuten larunbat arratsaldean, Amurrion (Araba). Martinek 676 puntu bigarrenari 24,5 aterata. Datozen bi asteburutan jokatuko dira faseko beste bi saioak, eta orduan erabakiko da nor pasatuko den finalera.
Ugaldetxoko bertsolariak, baina, esku-eskura du finala. Lortzekotan, bigarren oiartzuarra izango litzateke, Joxe Joakin Mitxelenaren ondoren (1960, 1962 eta 1965 urteetan aritu zen). Abenduaren 3an jakingo da, Bilboko saioaren ondoren.
Bertsoa.eus webguneari egindako adierazpenetan azaldu zuenez, sentsazio onak izan zituen saioan zehar, eta Amurrioko aretoa “goxo” zegoen. “Saritu behar zenean saritu dute”, zehaztu zuen. “Gorputzaldi ona” izateaz gain, gaiak “esanguradunak” izan zirela nabarmendu zuen oiartzuarrak.
“Gaiak mamitsuak izan dira, eta saiatu naiz zirrikituak bilatzen. Beti dago zer hobetua, horrekin oso kontziente naiz, baina oso kontent nago orain arte egindakoarekin”, gaineratu zuen Martinek.
Finala hain hurbil izateak “poza” sentiarazten dio bertsolariari, baina baita lana egiteko beharra ere. “Bertsotan egon nahi dut, ilusio hori elikatu nahi dut, bila ibili nahi dut, irakurri egin nahi dut, kideak entzun nahi ditut… Prozesuarekin gozatu nahi dut, eta bertsotan hobetzen segi nahi dut, ahal den neurrian”, iragarri du.
BERRIAk larunbateko saioaren kronika egin du. Irakurtzeko, sakatu hemen.
