Lartzabal eta Lintzirin biribilguneak konpontzeko hiru gauez lan egingo dute
Asteazken, ostegun eta ostiral gauetan arituko dira lanean. Desbideraketak eragingo dituzte obra horiek, egun bakoitzean zortzi orduz.
Lartzabalgo biribilgunea gauez itxita egongo da, hiru egunez. Gipuzkoako Foru Aldundiak iragarri duenez, lanak egingo dituzte Lintzirin eta Lartzabalgo biribilguneetan, eta haien sarbide-irteeretan. Hiru gauetan zehar arituko dira lanean, trafikoa gehiegi ez oztopatzeko. 22:00etatik 06:00etara arituko dira lanean.
Bihar —asteazkena, hilak 23— izango da lehenengo gaua. Lartzabalgo biribilgunean izango dira lanak, baita Lintziringo biribilgunearen lotzeko erraian ere bai.
Bigarren gauean, obrak Lintziringo biribilgunean izango dira. Gi-636 errepidera sartu eta irteteko erraietan ere arituko dira lanean.
Hirugarren eta azken gaueko lanak, berriz, bi biribilguneak lotzen dituen erreian arituko dira, Oiartzun eta Errenteria-Oreretara noranzkoan.
Desbideratzeak
Gauetan trafiko gutxiago egon ohi den arren, ibilbide alternatiboak eskainiko dituzte. Lartzabalgo nodoa itxita egongo denez, Errenteria-Oreretara Altamiratik sartu beharko da.
Oiartzunera joan nahi dutenek, berriz, Fanderia auzotik jo beharko dute. Hala ere, obrek iraun artean, Oiartzunen sartzeko aldundiak AP8 autobidea erabiltzea gomendatu du.
