Renfeko tren geltoki alboko parking berrirako milioi bat euro jasoko ditu udalak
Espainiako aurrekontuetatik Hego Euskal Herriko lau herrialdetarako partidak lortu ditu EH Bilduk. Parking berriaren proiektura bideratuko dute dirua, "herriko aparkaleku faltaren ondorioz dauden arazoak konpontzeko".
Espainiako aurrekontuetatik Hego Euskal Herriko lau herrialdetarako partidak lortu ditu EH Bilduk. Diru partida horretatik Errenteriako Udalak milioi euro bat jasoko du, Renfeko tren geltoki alboan eraikiko duten parkingaren proiektura bideratzeko, “herriko aparkaleku faltaren ondorioz dauden arazoak konpontzeko” asmoz. Horri lotuta, koalizioak jakinarazi du udalak eskatutako lursailen lagapenari behar bezala erantzuteko tramiteak hasiko dituela gobernuak.
Hala, “behin betiko urrats bat” ematen dela dio koalizioak, “Legegintzaldiko Planaren beste mugarri bat lortu eta herrian dauden aparkaleku plazak handitzeko”.
PSE-EEren eskaera
PSE-EE taldea ere parking berriaren proiektuarekin pozik agertu da. Hil hasieran testu bat erregistratu baitzuten sozialistek, alkateari eskatuz ADIFeko lurren zati bat emateko negoziatzen has dadila Estatuko Administrazio Orokorrarekin.
