Bakardadearen eraginak jasotzen dituen diagnosia aurkeztuko dute
Zaintzadi proiektuak bakardade ez-hautatuari buruzko azterketa egin du herrian. Astelehenean izango da aurkezpen saioa.
Hautazkoa ez den bakardade egoeran dauden Oiartzungo helduen bizi kalitatea hobetzeko Zaintzadi proiektu publiko-komunitarioa abian jarri zuten udaberrian.
Udalaren helburua baliabide gutxi dituzten eta inguruko pertsonen laguntza jasotzen ez duten 55 urtetik gorako pertsonen beharrak ezagutu eta haiei erantzuteko esku hartze sozio-hezitzailea egitea da. Komunitarioa izango da, eta herriko eragile eta herritarrak inplikatu dituzte.
Lehen fasean diagnostikoa egin dute. Horrela, herrian dauden baliabideak, sare komunitarioak, herri dinamikak eta mugak zeintzuk diren aztertu dituzte.
Herriko 27 eragileetako 45 pertsonekin elkartu dira proiektuko dinamizatzaileak. Gainera, 185 pertsonek erantzun dute gaiari buruz zabaldutako inkesta.
Jasotako informazio horrekin guztiarekin, bakardadeak duen eraginarekin diagnostikoa egin dute, eta aurre egiteko aktiboak zein baliabideak identifikatuko dituzte.
Aurkezpena, astelehenean
Diagnosiaren emaitzak datorren astelehenean, hilak 28, aurkeztuko dute. 19:00etan hasiko da saioa, udaletxeko pleno aretoan.
Aurkezpen saioa herritar orori irekia izango da. Udalak herritar zein eragileak gonbidatu ditu bertara. Ez-hautatutako bakardadeak suposatzen duen “erronka kolektiboari” aurre egin nahi diote modu horretan.
