Ziritzarako 300.000 euro lortu ditu EH Bilduk Espainiatik
Akordioari esker portuak udalari eskualdatuko dio eraikina, eta 300.000 euro txertatu. Antxoko bulebarrarentzako diru partida ez dute onartu.
Irisgarritasuna eta energia kontsumoa hobetzeko, besteak beste, egingo dute inbertsio ekonomikoa. 
Hego Euskal Herriko lau herrialdetarako partidak lortu ditu EH Bilduk Espainiako aurrekontuetatik. Adosturiko 480 milioi euroen artean badira pasaitarrentzako inbertsioak; zehazki, Trintxerpeko Ziritza eraikina portuak udalari ematea eta bertan 300.000 euro inbertitzea lortu ditu koalizio abertzaleak.
Bilkideek esandakoaren arabera, aurrekontuei aurkezturiko zuzenketa guztiak “herritarrek hainbat hamarkadetan eskatutakoak” izan dira. Hori bada, behintzat, Trintxerpeko kasua. Espainiako Gobernuarekin lortutako akordioari esker, Pasaiako Portuko Ziriza Etxea udalari eskualdatzeko tramiteak bizkortuko dituzte, eta bertako irisgarritasuna hobetzeko eta energia kontsumoa aurrezteko ekintzak aurrera eramateko 300.000 euro txertatuta.
Udalerriarekin loturiko bigarren proposamenak Antxoko Bulebarraren Aldeko Plataformaren iniziatiba sustatzea eskatzen zuen, eta hori ez dute onartu. Beraz, Adifen geltokia atzera eramateko eta, bidea zabalduz, bulebarra sortzeko 4 milioi euroko inbertsiorik ez du egingo Espainiako Gobernuak 2023an.
