[Bideoa] Bildts hizkuntzan idatziriko lehen nobelak Pasaia du oinarri
Herbehereetan 6.000 hiztun besterik ez ditu bildtsak. Gerard De Jong idazleak hizkuntza horretan idatzi du bere lehen lana, Donibane oinarri.
Gerard De Jong. 
Gerard De Jong kazetari eta idazleak Pasai Donibanen oinarrituriko eleberria kaleratu du; bildts hizkuntzan idatzi den lehena. Herbehereetako ipar-mendebaldean, Frisiako probintzian dagoen Het Bildt eskualde-udalerrian hitz egiten den hizkuntza da bildtsa; 6.000 hiztun besterik ez ditu.
Blau fan dagen, griis fan onrust (Egunen urdina, antsietatearen grisa) du izena nobelak. Joan den astean aurkeztu zuten Herbeeretan, eta orduko horretan bideo bat eman zuten, zeinetan Ubera liburutegiko lagunak agertzen diren, De Jongen lana Pasaiako barrutian jasotzeko unean. Eskaintza berezi bat zekarren horrek, “Donibaneko jende maitagarriari”.
Izan ere, duela 5 urte pare bat hilabeteko egonaldia egin zuen idazleak Donibaneko Hugoenea etxean, eta barrutiaz maitemindu zen denbora tarte horretan, hark adierazi duenez. Ez hori bakarrik, euskaltzale ere bihurtu zen, eta haren lehen eleberria idazteko inspirazioa eman zion. “Keinu xume honen esanahia ondo baino hobeto ulertuko duzue”, zuzendu zaie sanjuandarrei, “duela 5 urte hain ondo hartu ninduzuen guztioi bihotzez eskerrak emateko modua besterik ez baita”.
Bi astez egongo da eleberria Ubera liburutegian ikusgai. Gero, tokiko bildumaren atalean kokatuko dute eta hori izango du behin betiko leku. Jarraian, De Jong-en nobela liburutegian jaso zuteneko unea, bideoan.
Erlazionatutako edukiaGerard De Jong: «Gure autonomia politikoa galtzeak hizkuntza mehatxa dezake»
