Udalaren 2023ko aurrekontua %1'8 handiagoa izango da
18 milioitik gorako aurrekontua izango du Oiartzungo Udalak. Gizarte-Ongizatean, Euskaran, Feminismoan eta Kulturan handituko dira partidak, batez ere.
Oiartzungo Udalak finkatu du 2023ko aurrekontua. Azaroko plenoan bozkatu dute udal gobernuaren proposamena, eta EH Bilduren aldeko botoekin atera da aurrera. EAJ abstenitu egin da.
18.757.166,98 euroko aurrekontua izango da, iaz baino %1,8 handiagoa. Jon del Olmo Ogasun zinegotziak eman ditu azalpenak. Gogorarazi duenez, ekainean hasi ziren aurrekontuak zirriborratzen, eta irailean udaleko sailetatik pasatu zuten.
Ondoren auzoko bileretan landu zituzten, behin-betiko zenbakiak izan aurretik. Zerga eta tasa batzuk igo dituzte aurrekontua koadratzeko, eta horrez gain, Funts Foralak udalari egin dion ekarpena 600.000 euro izan direla aipatu du Del Olmok.
Hainbat arlo zehatz indartuko dituztela azaldu du: Energia trantsizioa; zaintza; digitalizazioa; eta komunikazioa. Horrez gain, Landetxe plazako eraikinari partida bideratuko zaio, baita sail zehatzak ere: Gizarte-Ongizatea, Euskara, Feminismoa eta Kultura.
EAJ abstenitu egin zen. Janire Mitxelena zinegotziak azaldu duenez, zalantzak sortu dizkiete aurrekontuek. “Gauza batzuekin ados gaude, baina beste batzuekin ez. Adibidez, gauden egoeran zerga eta tasak igotzearekin”. Hala ere, agintaldian bi udal taldeen artean “adostasuna” nagusi izan denez, beraien botoak ildo hori islatuko duela adierazi du: ez alde ez kontra.
Euskararen Eguna
Larunbatean, hilak 3, Euskararen Eguna izango da, eta horren harira, bi mozio aztertu zituzten. Lehena, EAJrena. Jeltzaleen proposamenaren arabera, “autogobernua” izan da euskararen historian “aurrerabiderik sendoena” izaten ahalbidetu duena.
Euskararen Legeak 40 urte bete dituela gogorarazi du, eta horrek “ospakizunerako” arrazoi ugari ematen dituela gaineratu. “Hartan dituzte sustraiak eta ezinbesteko lege babesa administrazioaren, irakaskuntzaren, hedabideen, helduen euskalduntzearen, esparru zientifikoaren, lan munduaren eta gizarte erabileraren alorretan, besteak beste, hartu diren neurriek”, esan du.
Legeari bainoago, indarra “adostasunean” izan duela uste du EAJk, eta euskarak adostasun ezak “hondamendi” lukeela iritzi dute. Mitxelenak adostasuna eskatu du aurrera begirako erronkei aurre egiteko, eta horren adibide jarri du Euskaraldia. “Euskarak batzen gaituelako, ez inola ere banatzen”, bukatu du.
EH Bildu abstenitu egin da. Josu Delgado Euskara zinegotziak esan duenez, ez da “erraza” izan aldeko botoa ematea. “Adostasuna eskatzen da, baina testuan ezin izan dugu gure hitzik txertatu”, azaldu du. Onartu du urratsak egin direla, baina egoerak “zaila” izaten jarraitzen duela. “Oiartzunen, adibidez, atzera egin du, azkeneko soziolinguistikoak erakutsi duenez”, gaineratu du.
“Pentsatzen dugu ez dela egokia ezkortasunez jokatzea, baina ezta autokonplazentziaz ere”, erantsi du. Euskararen etorkizunean “argi-ilunak” daudela uste du, eta ez dela “tremendismoarekin” jokatu behar. “Jakin beharko genuke bidea elkarrekin egin behar dugula”.
UEMAren mozio bat aurkeztu du EH Bilduk. Hori aho batez onartu zuten. Testuak azaltzen duenez, euskararen ezagutzak gora egin du, eta udalerri euskaldunak gero eta gehiago dira. “UEMAra batu diren udalerriak ikusita, 300.000 biztanle bizi dira euskararen lurgunean”. Gainera, euskaraz ekoizten denaren erdia udalerri horietan egiten dela nabarmentzen du mozio horrek, eta udalerri euskaldunek euskarari “hauspoa” ematen diotela.
Udalerri euskaldunak indartzeko bitartekoak eta neurriak behar direla esaten du UEMAk, baita haiek mantentzeko politikak ere, hala nola, hirigintzan, kulturan edo turismoan. “Arlo horietan hartzen diren erabakiek eragin handiagoa izan dezakete euskara zerbitzuetan hartzen direnek baino”, gehitu dute.
Aurtengo Euskararen Eguna garrantzia hori ikusarazteko baliatuko dutela aipatu dute.