Abenduaren 17an Asteasun irteera antolatu du Urdaburuk
Artean, Atxulondo burdinolaren arrastoetatik eta Belkoain gailurretik igaroko dira. Interesdunek formulario bat bete behar dute.
Atxulondo burdinolaren arrastoak. Abenduaren 17an, Errenteriako Urdaburu Mendizale Elkarteak Tolosaldeko biraren bederatzigarren etapa antolatu du. Ibilaldia Asteasutik abiatu eta Billabonan amaituko da; bidean Zizurkiletik, Atxulondo burdinolaren arrastoetatik eta Belkoain gailurretik igaroko delarik. Antolatzaileek sei orduko txangoa izango dela aurreikusi dute.
Irteeraren amaieran, mendizaleek txistorra-pintxoa jango dute Asteasuko elkartean. Ondoren aurrez prestatutako plater bat eskainiko dute, nahi duen ororentzat. Goizaldeko irteera 07:30ean izango da Zumardiko autobus geltokitik (Panier) eta 07:45ean Aritzetatik.
Zeharbidearen xehetasunak Urdaburuko web orrian kontsulta daitezke, esteka honen bidez.
Izena eman nahi dutenek Urdaburu Mendizale Elkartearen egoitzara jo dezakete astearte eta ostegunetan, 19:00etatik 21:00etara; egun eta ordu berean 943 527 879 telefonora hots eginez; edo hurrengo formularioren bitartez.
