Lezoko EH Bildu: "Aurrekontuek ez diete gaur egungo egoerari eta erronkei erantzuten"
10,1 milioi euroko aurrekontua izango du Lezoko Udalak 2023an. Koalizioak uste du ez dietela herriaren beharrei erantzuten.
Azaroaren 24an egindako udalbatzarrean 2023ko udal aurrekontuak onartu ziren, gobernu taldeko kideen (EAJ eta PSE-EE) aldeko zazpi botoekin, eta EH Bilduren kontrakoekin (sei). Horrela, Lezok, 2023an 10,1 milioi euroko aurrekontua izango du. Horren harira, EH Bilduk balorazioa bidali du hedabideetara. “2023ko udal aurrekontuek ez diete gaur egungo egoerari eta erronkei erantzuten”, esan dute.
Hala, gobernukideen proposamena nahikoa ez dela esateaz gain, “hutsalak diren hitz eta konpromisoak” dituela argudiatu dute bilkideek, “aurrekontuek ez dute bizi dugun krisi anizkoitzari erantzuteko nahikoa baliabide eskaintzen”. Hala, onartutako kontuak orain artekoen jarraipena direla uste dute, “ez dute gaur egungo egoerak eta etorkizunak eskatzen duten norabide aldaketarik sortzen”.
Koalizioak gobernu taldeak landutako proposamenari hemezortzi emendakin aurkeztu zizkion, 347.000 euroko partidak barruan zituztenak. Horretatik 40.000 euroko zatia onartu zuen gobernu taldeak, hainbat arlotakoak: “Hemezortzi emendakin horiek egoera zaurgarrian dauden herritarrak laguntzera, mugikortasuna edota aparkaleku arazoei aurre egitera, eta gainean dugun krisi klimatikoari erantzutera bideratuak ziren”. (Emendakin horien guztien zerrenda ikusteko, joan Lezoko EH Bilduren webgunera).
Zenbakietan sartuta, 2016ko udal aurrekontuekin alderaketa egin du koalizioak. Arreta berezia jarri dute Gizarte Zerbitzuen eta Inbertsioen atalean. “EAJ-PSE gobernuaren ikuspegi falta nabarmen erakusten dute”. Hala, 2016ko udal aurrekontuen (8 milioi eurokoa) eta onartu berri diren 2023ekoekin alderaketa eginez, pertsonal gastua %33,5etik %38,4ra igo dela nabarmendu dute, Gizarte Zerbitzuetarako gastua %8.1etik %8,3ra hazi, edo inbertsioak %7,11tik %7,06ra jaitsi diren bitartean. “Lezok pertsonak eta ingurumena erdigunean jarriko dituen politikak behar ditu. Lezoko udal aurrekontuek egiturazko aldaketak behar dituzte, udala beste norabide batean jarriko dutenak”, azaldu dute.
