Joxe Mari Mendikute hil da
Orereta Ikastolako irakasle izan zen, eta Oiartzungo herri mugimenduko hainbat saltsatan ibilitakoa zen, tartean Oiartzun-Karaez taldean.
Joxe Mari Mendikute. Joxe Mari Mendikute Muxika atzo (ostirala) hil zen, gaixotasun baten ondorioz. Gorpua Oiartzungo beilatokian egongo da, gaur arratsaldean, 16:00etatik 20:00etara.
Andoainen jaioa, aspaldi bizi zen Oiartzunen. Bertako herri mugimenduko hainbat saltsatan ibilitakoa izan da Mendikute, Txost pilota elkartean, esaterako. Horrez gain, Oiartzun eta Bretainiako Karaez herria senidetu zituen batzordearen bultzatzaileetako bat izan zen.
Bi herrien arteko harremana nola sortu zen gogorarazi zuen erreportaje honetan, duela hiru urte, senidetza hitzarmenaren 25. urteurrenean. Bitxikeria eta anekdota ugari kontatu zizkion ikasle izan zuen kazetari honi, berezkoa zuen umorearekin, udaberri goiz epel batean, Errenteria-Oreretako zumardi txikian.
Matematika irakasle
Lanbidez irakasle izan zen, Orereta Ikastolan. Natur zientziak eta matematikak irakasten zituen, azken horietako eragiketetan letrak sartzen hasten ziren ikasturteetan.
Ikasleek gustukoen izan ohi ez duten ikasgaia izan arren, oroitzapen ona utzi zuen bere eskolatik pasatu zirenengan. Nerabe txoro haiek arrastoan sartzen saiatzen zen bere umore zirtolariarekin, baita lortu ere. Sekula idatzi nahi ez den artikulu horietako bat sinatu duen honek ikasgelan entzunak zizkion “Arrondo, portatu hadi ondo”, “Etxebeste, ez hitz egin hainbeste”, edo “Gartzia, ez sartu ziria” bezalako ateraldiak.
Mendikute, ezkerrean (bizarrarekin), Oiartzungo eta Karaezeko orduko alkateek sinatutako hitzarmenaren lekuko izaten, senidetze batzordeko lehendakari gisa.
Matematiketan hutsaren hurrengoa ziren ikasleek ere gogoan iltzatuta dute aritmetikako kontzeptu bat: multiplo komunetako txikiena, m.k.t. siglekin laburbiltzen zena. Horretarako formula ahaztezin bat ematen zien, elaborazio propiokoa: MKT=MendiKuTe.
Urte batzuk bazeramatzan jubilatuta, eta bere pasioetako bati denbora eskaintzeko aukera gehiago zuen: ibiltzeari. Gaur Arditurriko bidegorria hutsago egongo da.
Ez multiplikagarria, ez txikia eta are gutxiago komuna zen irakaslea gogoan izango dute bere eskoletatik pasatutako ehunka ikasleek, bata zuria soinean, betiereko bizarrarekin. Lurra arin bekizu, Mendi.
