Bertsozale guztiak igandera begira daude
Gaur aurkeztu dute Bertsolaritza Txapelketa Nagusiko finala. Oiartzunen, mugimendu feministak pankarta jarri du, Alaia Martinen alde.
Plazan pankarta jarri dute, Alaia Martini eskerrak emateko. Bertsolaritza Txapelketa Nagusiko zita nagusia iristear da: astearteko 18:00ak direnean, 113 ordu besterik ez dira geratzen final handia has dadin.
Gaur aurkeztu dute finala. Datuak eman dituzte antolatzaileek: 13.000 ikus-entzule izango dira Nafarroa Arenan; 350 lagunek egingo dute lan finalean; eta zortzi bertsolari igoko dira oholtzara.
Horietako bat izango da Alaia Martin Etxebeste oiartzuarra. Finalerdietan puntu gehien lortu duen bertsolaria izan da, eta jokatu dituen hiru saioetan nagusi izan da.
Herrikideen babesik ez zaio faltako. Oiartzungo Feministen Asanbladak aitortza eta animoak uztartzen dituen pankarta jarri du plazan: Morez jantzi duzu pista / Eskerrik asko Alaia / Gora bertsogintza feminista.
Finalean inoiz baino emakume gehiago izango dira —hiru—, eta nork daki Martinek, Maialen Lujanbiok edo Nerea Ibarzabalek eramango duen txapela. Jantziko diona ziurra da: Iñaki Murua bertsolaria eta bertsolaritzaren sustatzailea izango da ohore hori izango duena.
Sarrerak, agortuta
Ezinezkoa da finalerako txartelik lortzea, irailean bukatu zirela jakinarazi baitute. Hala ere, finala oso-osorik jarraitzeko aukera egongo da, Iruñera joateko beharrik gabe.
ETB1ek emango du finala, Ilaski Serranok aurkeztuta. Jon Martin izango du ondoan, komentario teknikoak egiten.
Zortzi finalistek agerraldia egin dute Iruñean, gaur eguerdian.
Egin beharreko lanak
Goizean (11:00-14:30). Ateen irekiera: 09:00.
- Binaka, gaia emanda, hiruna bertso zortziko handian.
- Binaka, gaia emanda, hiruna bertso zortziko txikian.
- Banaka, lehen puntua emanda, hiru bertso zortziko txikian.
- Binaka, gaia emanda, hiruna bertso sei puntuko motzean.
- Ganbarako lana: banaka, gaia emanda, hiru bertso nahi den doinu eta neurrian.
Arratsaldean (17:00-20:30) Ateen irekiera: 16:00.
- Binaka, gaia emanda, hiruna bertso hamarreko txikian.
- Binaka, gaia emanda, zortziko txikian puntutan, zortzi bertso osatu arte.
- Banaka, gaia emanda, hiru bertso nahi den doinu eta neurrian.
Buruz burukoan
- Binaka, gaia emanda, hiruna bertso Iparragirre abila dela doinuan.
- Binaka, gaia emanda, hiruna bertso zortziko txikian.
- Ganbarako lana:
- Banaka, hitza gaitzat emanda, bertso bat bederatziko txikian.
- Gaia emanda, hiru bertso nahi den doinu eta neurrian.
