Trintxerpe KE: "Ahal genuen guztia egin genuen arbitroa artatzeko"
Trintxer Kirol Elkarteko zuzendaritzako zenbait kidek zuzenean ikusi zuten nola ikusle batek 16 urteko marrazainari eraso egin zion.
Artxiboko irudi bat. Joan den igandean Trintxerpeko futbol zelaian lehiaturiko Trintxerpe eta Behobiako Gazte Gorengo kategoriako futbol partidan, harmailetan zegoen ikusleetako batek 16 urteko arbitroari muturreko bat eman zion. Zenbait hedabidek emandako informazioaren arabera, etxeko taldeko kirolarien aita bat izan zen erasotzailea, eta matrailezurrean eman zion ukabilkada.
Marrazainak arbitraturiko bigarren partida zen igandekoa. Trintxerpe Kirol Elkarteko zuzendaritzak hedabide honi azaldutakoaren arabera, “neurrigabea” izan zen gertatutakoa. Zuzendaritza batzordeko kide batzuk ere harmailetan ziren, eta guztizko arbuioa adierazi dute auziaren aurrean: “Sekula gertatu beharko ez litzatekeen zerbait izan zen”.
Kirol elkarteko kideek “ahal izan zuten guztia” egin zuten erasoturiko adingabekoa artatzeko: “Gaztea lasaitzen saiatu eta kotxea ere eskaini zioten, nonbaitera hurbiltzea nahi ote zuen galdetuz, edota ondoezik bazegoen, etxera ere eramatea eskainiz”. Zuzendaritzatik emandako informazioaren arabera, beste zenbait arbitrorekin bueltatu zen epailea etxera, behin lehia bukatuta (2-3 Behobiaren alde).
Trintxerpe Kirol Elkarteko Zuzendaritza Batzordea gaur arratsaldean bilduko da jazotakoa “sakonki” lantzeko eta horren gaineko erabakiak hartu ahal izateko. Gipuzkoako Arbitroen Federazioko presidente Manu Diazek Noticias de Gipuzkoan egindako adierazpenen arabera, federakundeak behar diren neurri guztiak, “kirol alorrekoak nahiz judizialak”, hartuko ditu erasotzailea zigortzeko.
