Udal hauteskundeetarako programa "denon artean" osatu nahi du PSE-EEk
Herritarrekin batera herriaren diagnostiko bat egiteko hainbat saio egingo dituzte, "hauteskunde programan txertatzeko proiektu eta beharrak identifikatzeko" asmoz. Bihar egingo dute lehen saio irekia.
PSE-EE taldea 2023ko udal hauteskundeei begira jarri da dagoeneko. Gaurko agerraldian azaldu dutenez (bertan izan dira Isaac Palencia alkategaia eta Iñaki Ruiz eta Montse Luis zinegotziak), hauteskundeetarako programa osatzeko bidea hasiko dute bihar, herritarrekin batera diseinatu nahi dutela aurreratu dute gaurkoan. Horretarako, lehenik, eskuorri bat banatuko dute, herritarrek proposamenak eta kezkak helarazi ditzaten. Bestetik, helbide hau jarri dute herritarren eskura. Finean, herriko auzo elkarteekin eta auzotarrekin zuzenean hitz egiteko asmoa dute sozialistek, “udaletxe honek sistematikoki jaramonik egiten ez dien eskaerak aztertzeko” asmoz.
“Merezi dugun Errenteria eraikitzeko denon artean egin behar dugu herria. Ezin gara ohitu herritarrei bizkarra ematen dien alkate bat izatearekin. Ezin gara ohitu herritarren idatziei erantzuten ez dien alkate bat izatearekin. Zergatik da hain zaila zinegotzi batek herritar bati erantzutea? Auzotarrekin batera afera hau aldatzeko prest gaude”, esan du lehenik Palenciak.
Maiatzera bitarte hainbat prozesu ere zabalduko dituztela aurreratu du taldeak. Hauek, Herriko Etxea “herriko etorkizuneko politikak eztabaidatzeko erreferentziazko gune” izatea ahalbidetuko dutela diote. “Beti bezala, Herriko Etxeko ateak zabalik izango dira”.
Bihar (hilak 14) egingo dute lehen saio irekia, 18:30ean. Honetan, herriaren diagnostiko bat egingo dutela aurreratu dute, “hauteskunde programan txertatzeko proiektu eta beharrak identifikatzeko” asmoz.
Errenteria-Orereta Gipuzkoako hirugarren udalerria dela gaineratu du azkenik Palenciak, eta halere, azken urteetan udalak inbertsio estrategikoak alde batera utzi dituela salatu du. “Komertzioan, ostalaritzan eta industrian indarra berreskuratu behar duen herria behar dugu. Errenteria bizia behar dugu berriro ere”.
