4.500 metro koadroko biltegi bat eraikiko dute Lezoko kaian
Portuak Manuel Camara enpresari 30.000 m2-ko partzela bat esleitu dio, 30 urtez ustiatzeko. Eraikina, gehienez, 20 hilabetean bukatuko dute.
Guztira, 28.788 metro koadroko eremua esleitu dio PPAk Manuel Camara enpresari, zentral termikoa zegoen orubean. 
Sobrinos de Manuel Camara, S.A. enpresak 4.500 metro koadroko biltegi berri bat eraikiko du Lezoko kaian, Pasaiako Portu Agintaritzaren eremuan. Erakundeak urriaren 21eko Administrazio Kontseiluan onartu zuen Lezoko dartsenan, guztira, 28.788 m2-ko eremua ematea enpresari, terminal balioaniztun berri bat ustiatzeko.
Portu espazio hori —Iberdrolaren zentral termikoaren eta Lezoko ikatz-landaren kokaleku zaharra— 30 urtean ustiatu ahal izateko hitzarmena sinatu du enpresa esleipendunak. Orubea jarduera ezberdinetarako erabiliko du Manuel Camarak, baina aipatu biltegia, nagusiki, produktu siderurgikoak gordetzeko baliatuko da.
PPAko presidente Joakin Telleria asebete agertu da sinaturiko akordioarekin, portuko bezero garrantzitsuenetako baten jarduna 30 urtez bermatuta egongo delako. Emakidadun berriak 1.175.000 euroko inbertsioak aurreikusi ditu guztira, “eta horrek operadoreak Pasaiaren alde egindako apustu garrantzitsua suposatzen du”, gehitu du. Inbertsio horrek bat egiten du PPAk Lezoko dartsenarako sarbidea hobetzeko aurreikusitak lanekin, ontzi handiagoak heldu ahalko direlako Manuel Camararen eremu berrira etorkizunean.
Sobrinos de Manuel Camarak zortzi hilabeteko epea igaro baino lehen hasiko ditu obrak, eta lan horiek, gehienez ere, urtebetez luzatu ahalko dira. Hortaz, aurreikuspenak beteko balira, 2024ko abuztua baino lehen eraikita eta martxan legoke biltegia.
