Apostatatzera deitu du mugimendu feministak, eta baliabideak eman ditu
Oiartzungo elizan bataiatuta egon eta Elizatik atera nahi dutenei deia egin diete. Presentzialki edo online egin daiteke.
Oiartzungo parrokian bataiatuta daudenek modu kolektiboan apostatatzeko deia egin dute. Oiartzungo Feministen Asanbladak gonbita egin die Oiartzungo elizan bataiatuta egon eta katolizismoari uko egin nahi dioten pertsonei. “Batera apostatatzeko” deia egin dute.
Horretarako zein pauso eman behar diren azaldu dute. Lehenik eta behin, Bataio Agiria eskatu beharko dute. Ondoren, mugimendu feministak apostatatu nahi duten horiei datuak eskatu dizkiete. Bi aukera eman dizkiete:
- Online: Ondoan dagoen QR kodea eskaneatuz, eta galdetegia betez.
- Aurrez aurre: Datorren astelehenean, hilak 19, Munanier lokaletik pasa daiteke, 16:30etik 19:30era bitartean.
Galdetegia betetzen duten pertsonen datuak batu, eta modu kolektiboan apostatatuko dutela azaldu dute.
Hamabost arrazoi
Oiartzungo Feministen Asanbladak gogorarazi duenez, apostasiaren bitartez, bataioko edo bestelako sakramentuen bidez jaso diren Eliza Katolikoaren dogma eta sinesmenei esplizituki uko egitea da.
Hori egiteko hamabost arrazoi eman ditu herriko mugimendu feministak. Honela zerrendatu dituzte argudio horiek, hitzez hitz:
- Eliza matxista eta patriarkala delako.
- Elizak bere ideiak eta morala inposatu nahi dituelako.
- Elizak LGTIBQ+ pertsonak gaixotzat hartzen gaituelako.
- Elizak familia nuklearra eredu bakartzat duelako.
- Elizak pederastia kasuak isildu dituelako.
- Elizak abortua eta eutanasia gaitzesten dituelako.
- Elizak antisorgailuen erabilera gaitzesten duelako (sexu bidezko gaixotasunen transmisioa eta haurndunaldiak saihesteko aukera ezinezko eginez).
- Elizak sexualitatea eta plazera bekatutzat hartzen dituelako.
- Eliza diru publikoz finantzatzen delako.
- Erlijio irakasgaia diru publikoz finantzatzen delako.
- Eliza ia zerga guztiak ordaintzetik salbuetsita dagoelako.
- Elizak inmatrikulatuta dauzkan ondasun kopurua izugarria delako.
- Elizak errenta aitorpenean laukitxoa duelako, PFEZan zergen %0,7 eurei bideratzeko.
- Elizak sorgin-ehiza bultzatu zuelako.
Apostasia egiteko urratsak
Oiartzungo feministek deialdi kolektiboa egin duten arren, apostasia bakarka edo aurrerago egin nahi dutenentzako pausoak zeintzuk diren azaldu ditu. Sei dira:
- Bataiatuta zauden elizan Bataio Agiria eskatu.*
- Bataio Agiria eta Nortasun Agiria fotokopiatu.
- Donostiako Gotzaindegira deitu.**
- Gotzaindegian, Mikel Iraundegigatik galdetu, apostatatzeko elkarrizketa ordua finkatu.
- Elkarrizketara Bataio Agiria, nortasun agiriaren fotokopia eta, nahi bada, apostatatzeko eskaera-orria eraman (bestela, azken hori han emango diote eskatzaileari). Bertan, Elizaren kanpo egotearen ondorioak irakurri eta horiekin ados dagoela adierazi. Iraundegik bidaliko ditu paperak Artzapezpikutzara.
- Handik hilabete ingurura, etxera helduko da apostatatu izanaren dokumentua.
*Oiartzunen Bataio Agiria eskatzeko: 608 75 83 76 telefono zenbakira deitu, eta datuak eman. Agiria prestatu eta bueltan deituko dute.
**Gotzaindegiarekin harremanetan jartzeko datuak: Mikel Iraundegi Atxabal. Donostiako Gotzaindegia. Heriz pasealekua, 82, 20008, Donostia. Telefonoa: 943 28 50 00.
