Gabierrotako Udal Gaztelekuko gazteek 'Lagunak' sortu dute
'Lagunak' film laburraren proiekzioa egingo dute ostegunean (hilak 22) Niessen aretoan. Mahai-ingurua ere izango da.
2021-2022 ikasturtean Gabierrotako Udal Gaztelekuko gazte talde batek film laburra prestatu zuen. Orain, hori jendartera zabaltzeko bigarren txanda iritsi da (lehena uztailean izan zen). Lagunak izena du ikus-entzunezkoak. Argia, lehenengoz, ostegun honetan (hilaren 22an) ikusiko du, 18:00etan, Niessen aretoan (17:45ean zabalduko dituzte ateak). Proiekzioaren ondoren, solasaldirako tartea izango da zabalik, mahai-inguru formatuan.
Sei gaztek parte hartu dute sormen lanean. Gaztelekuko lantaldearen laguntza izan dute. Aniztasun funtzionala duten pertsonen bizitzaren eta bizi dituzten egoeren gaineko gogoeta egiteko ondu dute laburmetraia, nerabeetan zentratua. Horien inklusio bideak landu, eta aniztasuna ikusarazi nahi dituzte.
Proiekzio horren aurretik, udal ludoteketako haurrek egindako beste sormen lan baten berri izango dute bertaratzen direnek. Izan ere, Kultur Malutak iniziatibaren barruan Lekuona Fabrikako espazioak negura hurbiltzeko lanketa egin zuten, eta horren berri eman nahi dute.
