Lehen sektore zein kultur ekitaldientzako diru-laguntzak onartu dituzte
Aho batez onartu dituzte gai guztiak urteko azkeneko plenoan. Udal idazkaria agurtu dute, 27 urteren ondoren.
Maribi Joaristik (makurtuta, lore-sortarekin) eskertza jaso zuen. Astearte arratsean egin zuten urteko azkeneko udalbatzarra. Adostasuna izan zen nagusi, eta bozketa guztiak aho batez onartu ziren.
Hala izan zen lehen sektoreari diru-laguntzak bideratzeko puntuan. Lehen sektoreko egitasmoak 46.908,98 eurorekin laguntzea erabaki zuten. 2022ko abenduaren 1a bitarte egon da irekita diru-laguntzak egiteko epea eta 33 eskaera aurkeztu dituzte.
Bestalde, 2023an Oiartzunen egingo diren kultur ekitaldiak antolatzeko beste diru partida bat onartu zuten: 43.250 euro banatuko dituzte kultur eragileen artean. Eskaera urtarrileko egunetan egin beharko da.
Oinherriko kide
Oiartzun Oinherri Elkartearen udalerrien sarera batzea adostu zuten, bazkide laguntzaile figurarekin. Herri hezitzaileak egituratu eta sustatzeko sortu zen Oinherri, duela bost urte.
Bestalde, argindarra eta gasaren igoera dela eta, kirol instalazioetako gastua igo egin da, eta hori orekatzeko 34.620,78 euroko konpentsazio gehigarria bideratuko du udalak.
Udal idazkariaren agurra
Urteko azkeneko plenoa izan zen asteartekoa, baina baita Maribi Joaristi udal idazkari izandakoarena ere. 27 urteren ondoren, Hirigintza Saileko bere postura bueltatuko da.
Jexux Leonet alkateak esker oneko hitzak izan zituen, eta herriarekin duen “konpromisoa” txalotu zuen. “Langile publiko batek izan beharko lukeenaren eredua da Maribi”, gaineratu zuen. “Herritar asko joan dira beregana, haien gaiarekin nondik hasi ez zekitela, eta Maribik bere bulegoan jaso eta irtenbide eta soluzioak eman dizkie denei”.
Sentipen gazi-gozoa utzi dio Leoneti. “Pena”, badoalako, eta “poza” Joaristik hala erabaki duelako.
Azken 27 urteetan udal idazkari lanetan aritu denak hitza hartu zuen, eta orduan berarengan jarri zuten konfiantza eskertu zuen. Bere ibilbidean gauza txarrak eta onak ezagutu dituela adierazi zuen, baina onekin geratuko dela. Momentu onen artean dago zinegotzi eta lan taldearekin izandako tratua, aitortu zuenez.
Oihane Mallagaray izango da hurrengo udal idazkaria. “Esku honetan utziko dut postua”, iragarri zuen Joaristik.
