Berriro ere elkarlanerako deia egin dio SOS Antxok udalari
Topoko obren jarraipenerako batzordea sortzeko ezetzaren aurrean, hausnarketa egin dute Antxoko koordinakundeko kideek.
SOS Antxoko zenbait kide, udaletxearen aurrean, artxiboko argazki batean. 
Joan den hilabeteko udalbatzarrean gainontzeko alderdien babesik gabe gelditu zen Antxoko topoko obren jarraipenerako batzorde bat sortzeko EH Bilduren proposamena. Bilkura horretara bertaratu ziren SOS Antxo Koordinakundeko zenbait kide, balizko batzordearen parte izateko nahimena berrestera.
Bertan, zinegotzi guztien aurrean, eta alkatea zuzenean interpelatuz, mahai hori sortzeko euren argudioak mahaigaineratu zituzten antxotarrek. Koordinakunde osoaren izenean euren hitzak babestu dituzte orain gainontzeko kideek, jazotakoaren gaineko hausnarketa eginez horretarako.
Auziaren hastapenetara egin dute atzera begirakoa, iritzita Ibaiondon egindako lehen aurkezpenean “informazio gutxi” eman zietela arduradunek bizilagunei proiektuari eta horren afekzioei buruz. Orduko hartan, udalak eta ETSk bi hilean behineko bilerak agindu zituztela gogora ekarri dute; 0rduz geroztik, baina, bi bilera baino ez dira egin, “betiere koordinatzaile honek behin eta berriz eskatuta, eta manifestazio bat tarteko”.
“Inork ez daki ezer”
Hori gutxi balitz, irailerako agindutako parte hartze prozesuaz ezertxo ere ez dakitela salatu dute, eta udal arduradunen presentzia eskasaz penatu dira: “Proiektu honen hasieratik, udaleko Hirigintza saila, Loreto Osa zinegotzia buru duela, erabat desagertuta dago, eta zeregin hori Zerbitzu sailaren esku utzi da, Andrea Palomaresen gidaritzapean”.
Argi dute udalak ez duela hirigintza planteamendurik, eta berriro egin diete dei agintariei elkarlanean aritzeko, proiektuaren zenbait xehetasun antxotarren mesedetan moldatzeko, “eta, azken emaitza gisa, bizi-kalitatea eta etorkizuna hobetzeko”.
Batzordea sortzeko ezetzarekin kezkatuta agertu dira: “ETSk jakinarazi zigun ez dutela inolako eragozpenik koordinatzaile honekin biltzeko, betiere udalaren oniritziarekin”. Udal gobernuaren kontrako bozkaren eta Podemosen abstentzioaren gainean ez dute baloraziorik egin nahi izan.
