Kordeleia eraikinean 33 eguzki plaka jarriko ditu udalak
Donibaneko azpiegituran kontsumitzen den energiaren zati bat hornituko dute sei hilabeteko epean instalatuko diren plaka fotovoltaikoekin.
Estalkian 33 plaka fotovoltaiko jarriko ditu udalak. 
Donibaneko Kordeleia kirol eta kultur eraikinaren elektrizitate kontsumoaren zati bat plaka fotovoltaikoekin hornitzeko asmoaren berri eman du udalak. Horretarako, 33 eguzki modulu jarriko dituzte azpiegituraren estalkian, 24.800 euro inbertituz.
Panel horiei esker urtero 15.000 kWh sortu ahal izatea da aurreikuspena, eta sei hilabeteko gehienezko epea ezarri dute instalazioa egiteko.
Dagoeneko 103 eguzki plaka ezarri dituzte aurten Pasaiako udal eraikin handienetan, eta Kordeleian ipini nahi dituztenak horiei batuko zaizkie epe ertainean, denera 136 modulu izango direlarik. Guzti horien artean 60.000 kWh garbi eta iraunkor sortuko dira urtero herrian.
