Berdintasunean formazioa jaso dute udal langileek
Udaleko administrari eta teknikari guztiak trebatu dituzte, sail guztietan feminismoa txertatu nahi dutelako. Formatzen jarraituko dute.
Berdintasuneko etengabeko formazioko saioa izan da.
Oiartzungo Udalak jakinarazi duenez, bertako administrari eta teknikariek berdintasunean formazioa jaso dute. Emakume eta gizonen berdintasunerako lege berriaren aldaketa nagusiak zein diren landu dituzte udaleko langile horiek. Gainera, euren egunerokoari aplikatuta, sail bakoitzari bereziki zerk eragiten dion landu dute.
Udalak jakinarazi duenez, “etengabeko formazioan” jarraituko dute langileek, sail guztietan generoaren ikuspegia txertatzen joateko.
Izan ere, udal erakundearentzat, politika tradizionalak “ikuspegi androzentrikoarekin” egin izan dira, gizonen lehentasunak” erdigunean jarriz.
“Errotik aldatu nahi du hau Oiartzungo Udalak eta udaleko sail guztietan feminismoa zeharlerro moduan txertatzea du helburu, egiten diren proiektu guztietan gizon-emakumeen arteko parekidetasuna bultzatzeko”, azaldu dute.
