[Erreportajea] Kultur proposamenek aterpe berri bat dute Donibanen
Urtea ixteko ate berri bat zabaldu du Bixi-Bixi Elkarteak: Kultur Aterpea inauguratu dute. «Herriari bizia emango dion» espazioa izango da, «elkarte, norbanako edo mugitu nahi duen edonorentzat».
Kulturak arnasgune berri bat du Donibanen joan den abenduaren 30etik. Egun horretan inauguratu zuen Bixi-Bixi Elkarteak Kultur Aterpea izenez aurkezturiko espazioa, eta kulturzale aski nahiz ikusmirak bultzaturiko besterik ere hurbildu zen ordukoan Nicolasa jatetxearen eta Victor Hugo Etxearen arteko izkinan dagoen lokalera. Aretoa, zaharberritu badute ere, ez zaie arrotz izango sanjuandar koskorturikoenei, frankismoaren ondorengoko lehen gazte mugimendu eta kultur saiakerak ere bertan hauspotu baitziren. Bixi-Bixiko kide Garazi Alegria Goienetxea bizilagunek kontaturikoaz mintzatu da: «Herriko zaharrekin hitz eginda diote guztirako lokal bat izan zela: bilerak, entseguak, euskararen inguruko eztabaidak, parrandak… Gero, denborarekin, hori hil egin zen, baina garai batean hori guztia izan zen».
Izaera aski izan ditu aretoak. Azken erabilerak erretiratuen egoitza gisa eman zizkioten, eta ordutik «urte piloa» daramatza itxita, Alegriak azaldu duenez. Orain ateak berriro zabaltzea lortu dute, parrokiarekin akordio bat eginda [haiena baita espazioa]. Hura eraberritzearen truke utzi diote Bixi-Bixiri lokala lau urtez.
Kudeaketa elkartearen esku egongo bada ere, espazio irekia izan dadin da asmoa: «Topagune izango da bizilagun nahiz elkarte ezberdinentzat. Bixi-Bixik hartu du, baina intentzioa da herritar eta herri mugimendu guztientzat irekita egotea; bai elkarte, norbanako edo mugitu nahi duen edonork eduki dezan toki fisiko bat kultur ekimenak garatu eta dituen beharrak asetzeko».
Ate-zabalik
Badute, baina, sanjuandarrek kultur agertoki sonatua den bat: Juanba Berasategi. Kultur Aterpeak, ordea, erabilera anitzeko espazio handiak eskaini ezin duena izan nahi du, txikiagotik. «San Juanek dituen kultura beharrentzat erreferentzia puntu bizi bat izatea nahi dugu, baina Juanbak ez duen modu informalago edo txikiago batean». Funtzionamenduari buruz galdetuta, sanjuandarrak azaldu du Kultur Aterpea ez dela uneoro zabalik egongo, «ez du beti irekita dagoen taberna izaera bat izango», baizik eta ekintza konkretuetarako irekiko ditu ateak. Bixi-Bixik bertan lekukotuko du bere kultur agenda urteroko proposamenekin eta eskaintza berriekin, «baina beste elkarteek-edo erabili nahiko balute», egin du gonbita Alegriak, «eskaera egin besterik ez dute, eta hartarako irekiko litzaieke».
Horrez gain, nerabeei orain arte izan ez duten espazio bat ere eskaini nahi die Kultur Aterpeak. «Ez dute herrian non elkartu eta, gonbita heltzen badute, intentzioa da beraiei ere eskaintzea espazio hau, behar dutenerako». Sanjuandar gazteekin hitz egitea da Bixi-Bixiren asmoa, bertan gara litekeen edozein nahi edo asmo egotekotan, aukera hori eskura jartzeko. «Galdetu nahi diegu zer gustatuko litzaiekeen egitea, pelikulak jarri baldin bada, bada, pelikulak jarri. Euren interesei ere erantzun nahiko genieke, eta behar duten laguntza teknikoa eskaini ezer antolatu nahiko balute».
Urtea hasi besterik ez da egin, eta horrekin Kultur Aterpearen bidea ere abiatu da. «Herriari bizitza emango dion» aterki bat izatea nahi dute, «elkar-elikatuko gaituena».
