Udal Euskaltegian matrikulatu daiteke jada
A1, A2, B1, B2, C1 eta C2 mailako tituluak eskuratzeko aukera emango dute aurten ere. Astean 20, 15, 10 edo 5 orduko ikastaroak eskainiko dituzte.
Udal Euskaltegiak ikastaro berriak jarriko ditu martxan. Errenteriako Udalak jakinarazi du zabaldu dutela jada Udal Euskaltegian matrikulatzeko aukera. A1, A2, B1, B2, C1 eta C2 mailako tituluak eskuratzeko aukera emango dute aurten ere, astean 20, 15, 10 edo 5 orduko ikastaroak eginez. Eskolak goiz, eguerdi eta arratsaldetan izango dira. Hilaren 31a izango da apuntatzeko azken eguna.
Prezioa ordu kopuruaren araberakoa izango da. Langabetuek ez dute dirurik ordaindu beharko eta gainerakoek errenta mailaren arabera ordainduko dute. Bestalde, gurasoek kenkari bereziak izango dituztela aurreratu du udalak.
Izena emateko 943 44 96 80 telefono zenbakira deitu beharko da eta informazio gehiago jasotzeko euskaltegitik pasatzeko deia egin diete errenteriarrei, astelehenetik ostegunera 9:00etatik 17:00etara edo ostiraletan 8:00etatik 14:00etara.
