[Erreportajea] Gamon familia, beste 50 urte betetzeko ilusioz beterik
Cristobal Gamon ikastetxeak mende erdia ospatuko du aurten, asteazkenean hasiko dute ospakizun sorta. Langile edo ikasle ohiei proposamenak bidaltzeko deia egin diete, «festa biribiltzeko».
Cristobal Gamon ikastetxeak 50 urte beteko ditu aurki, ederki ospatuko dute urteurren biribila. Asteazkenean ekingo diote ospakizun sortari, hitzordu garrantzitsua dute Gamon familia osatzen dutenek. Bada, haur eta gurasoen gozamenerako, ez da bakarra izango, ekainera bitarte luzatuko baitute festa.
Ekitaldi ia gehienak ikasleei begira antolatu dituztela azaldu du ikastetxeko zuzendari Aitor Sarasuak. «Hemen bagaude, haiengatik da». Halere, guraso eta ikasle izandakoek ere gozatzeko aukera izango dutela aurreratu dute, «denetik» antolatzen ari baitira. Dagoeneko egitarau bat ondu dute, baina horri askotariko ekitaldi eta ekintzak gehituko zaizkiola kontatu dute. «Gurasoekin eta ikasle ohiekin batera osatu nahi dugu egitaraua, elkarlana izan dadila nagusi», dio Guraso Elkarteko lehendakari Imanol Cidonchak.
Sarasuak eta urte luzez irakasle bezala aritutako Gema Sagardiak atzera bota dute begirada, eta hezkuntza zentroak izan duen bilakaeraz aritu dira. Bereziki euskarak azken hamarkadetan hartu duen indarraz aritu dira, harro. «Hasieran A eredukoa zen, gerora B izatera pasatu zen, eta egun Da dugu. Gure funtzionamendu guztia euskaraz da», esan du Sarasuak. Ikastetxea «herriarekin batera aldatzen» joan dela erantsi du Sagardiak, eta eskolak duen aniztasuna nabarmendu nahi izan du. «Herri anitza da gurea, ikastetxea bezalaxe, eta harro gaude horrekin». Egun, ia 500 ikasle ditu Gamonek.
Urteurrena biribiltzeko proposamen oro aztertuko dutela aurreratu du hirukoteak. Horiek, helbide honetan edo 943 89 91 38 zenbakian jasoko dituzte.
Egitaraua:
- Hilak 18 (asteazkena): Inaugurazio ekitaldia egingo dute, 12:00etan, Cristobal Gamon ikastetxean.
- Otsailean zehar Kaldereroak eta Inauteriak ospatuko dituzte.
- Martxoak 25 (larunbata): San Markora irteera egingo dute Guraso Elkartekoekin, eta bueltan merienda eta musika izango da.
- Martxoak 31 (ostirala): Eriz Magoaren emanaldia.
- Apirilak 21 (ostirala): Ipuin musikatua egingo dute Oihan Vegarekin eta HH eta LH 1. zikloko ikasleentzat.
- Maiatzak 13 (larunbata): Bazkaria egingo dute, eta eguna bukatzeko dantzaldia egingo dute Oihan Vegarekin.
