Xanistebanetako festa eredua "hobetzeko" prozesua hasiko da bihar
Hiru hausnarketa saio egingo dituzte, herriko festak hobetzeko asmoz. Gau batzordea eta txupinazoa izango dituzte hizpide lehen saioan.
Txupinazoa izango da aztertuko duten gaietako bat. Xanistebanak urruti geratzen dira, baina herriko festak lantzeko prozesua bihar hasiko da. Apirilean hasiko da Jai Batzordea biltzen, egitaraua prestatzeko, baina lehenago festa ereduari buruz arituko dira.
Bide horretan, xanistebanetako eredua “hobetzeko” hiru hausnarketa saio egingo dituztela iragarri dute, bai festei zein Jai Batzordeari dagokienez.
Lehenengo hitzordua bihar —hilak 17— izango da, Manuel Lekuona bibliotekan. 18:00etan hasiko da bilera hor. Bi gai nagusi landuko dituzte bertan.
Alde batetik, gau batzordearen funtzionamendua izango dute hizpide. Bestetik, txupinazoa. Bigarren gai horri dagokionez, honakoak landuko dituzte: txupinazoa nork bota erabakitzeko irizpideak, txupinazoa botatzeko unean plazan genero-aniztasuna eta giroa nola bermatu…
Bilerak ordu eta erdi inguruko iraupena izango du.
