Sare komunitarioa sortzen hasiko dira, bakardade ez-hautatuaren kontra
Diagnosia aurkeztu zuen udalak azaroan. Orain, bakardade ez-hautatuari aurre egiteko sare komunitarioa sortzen hasiko dira.
Diagnosia aurkeztu zuten azaro bukaeran. Oiartzungo Udalak bakardade ez-hautatuan bizi diren helduen bizi-kalitatea hobetzeko asmoz, Zaintzadi proiektua abiarazi zuen pasa den udaberrian. Lehen fasean baliabideak, sare komunitarioak, herri dinamikak eta mugak zein diren aztertu dituzte. Gaiarekin modu batean edo bestean lan egiten duten 27 eragileetako 45 lagun elkarrizketatu dituzte. Gainera, 185 herritarrek inkesta bat bete dute. Diagnosi horren emaitzak aurkeztu zituzten azaroan.
Ondorioztatu dutenez, bakardade ez-hautatua dagoen norbait ezagutzen dute %93k, baina ez daukate detekzio hori modu azkarrean egiteko gaitasunik (%79). Jarduera prebentiborik ea ezagutzen duten galdetu dietenean, %71k ezetz esan du.
Herritarrei, beraz, urrun geratzen zaie bakardade ez-hautatuaren kontzeptua. «Ez dugu ongi ulertzen zer den eta, gaiarekiko sentsibilitatea izanik ere, egoera horretan egon daitezkeen pertsonak detektatzeko gaitasun handirik ere ez dugu», adierazi du Oiartzungo Udalak.
Horregatik, uste dute sentsibilizazio, kontzientziazio eta formakuntza beharrezkoak izango direla uste dute, bakardadean bizi diren pertsona horiek identifikatu eta nola lagundu jakiteko.
Hurrengo urratsa, beraz, esku-hartze indibiduala izango da. Udalak identifikatuta ditu egoera zaurgarrian dauden pertsonak, eta orain hasiko dira beraien beharrak zein diren ikusten eta proiektuan parte hartu nahi duten galdetzen. Hala ere, egoera horretan bizi diren lagun gehiagoren berri izateko, eragileen inplikazioa beharko dute. Sare-komunitarioa osatzeko, saio ireki gehiago antolatuko dituzte.
