Energia eta Klima Planak 2050. urterako ikuspegia izango du
Plana osatzeko prozesua martxan jarri du Oiartzungo Udalak. Diagnosia egingo dute lehenik, eta ondoren helburuak finkatuko dituzte.
Plana egiteko prozesua atzo aurkeztu zuten. Oiartzungo Klima eta Energia Plana egiteko prozesua abiarazi du Oiartzungo Udalak. Epe luzerako ikuspegia izango du. 2030., 2040. eta 2050. urteetarako udalak eta Oiartzunek energia arloan bete nahi dituen helburu estrategikoak zein horietara iristeko ekintzak jasoko dituzte plan horretan.
Udala ari da trantsizio energetikorako pausoak ematen, eta horiei jarraipena eman nahi die plan horren bitartez. Aurrera begirako erronkak zehaztu eta lehentasunak identifikatu dituzte.
Bi fase
Plana sortzeko epea urtebetekoa izango dela iragarri dute, eta bi fase izango dituela. Lehenengoa diagnosia izango da. Apirila bitartean, Oiartzunen klima-aldaketak izan dezakeen eragina eta hau gutxitzeko ditugun aukerak aztertuko dira.
Bigarren fasea, berriz, helburu kuantitatiboak jartzeko izango da; zehazki, 20230., 2040. eta 2050. urteetarako. Horiek ea betetzen diren ikusteko adierazleak ezarriko dituzte. Bigarren fase horrek lau hilabete iraungo ditu.
Herritarrekin elkarlanean
Klima eta Energia Plana herritarrekin elkarlanean osatu nahi du udalak, bi faseetan. Horretarako, saioak egingo dituzte: herriko enpresekin, lehenengo sektoreko eragileekin, ikastetxeekin, hirugarren adinekoekin, gazteekin…
Auzoz auzo ere bilera irekiak egingo dituzte. Gainera, ekarpenak egin nahi dituzten herritarrek galdetegia bete dezakete, udalaren webgunean jarriko dutena.
Ekainerako, bilera orokor bat antolatzea pentsatu dute, ekintza-plana aurkezteko eta 2024. urtera begirako lehentasunezko jarduerak proposatzeko.
Plana sortzeaz harago, garapenaren jarraipena egiteko, udaleko ordezkariek eta herritarrek osatutako batzorde bat sortuko dute. “Klima-aldaketaren eta energia-trantsizioaren erronkari elkarlanean erantzuteko sortuko da foro hori”, esan du
