'Azken borondateak' tailer praktikoa eskainiko du Lurgorri Kultur Elkarteak
Udalerrian gaiarekiko erreferentzia izango duten talde sentsibleak sortu nahi ditu elkarteak, "tresna egokiak eskaintzeko, heriotza eta galera egoerei aurre egin ahal izateko".
Lurgorri kultur elkarteak aurtengo hitzaldi zikloari ekingo dio datorren ostegunean (hilak 26), Javier Aramendiak eskainiko duen Azken Borondateak tailer praktikoarekin. Merkatuzarren bilduko dira, 19:00etan.
Iaz hasitako hitzaldi ziklo honekin “gure pentsamendu kritikoa eratzen lagunduko digun gaurkotasun sozio-politiko-ekonomikoa zabaltzeko eta eztabaidatzeko eragile aktibo bihurtzeko” helburua du elkarteak.
Aste honetako saioa Bihotzetik elkarteak zuzenduko du, “bizitzaren amaiera, dolua eta galeren prozesuak humanizatu eta naturalizatzeko” asmoz. Udalerrian gaiarekiko erreferentzia izango duen talde sentsibleak sortu nahi dituzte, “haiei tresna egokiak eskaintzeko, heriotza eta galera egoerei aurre egin ahal izateko”.
“Gure gizartea apurka-apurka zahartzen ari denaren kontziente, hirugarren emanaldi hau antolatzea otu zitzaigun. Lurgorrin, pertsona bakoitzak bere bizitza kudeatzeko duen eskubidea bistaratu eta errespetatu behar dugula pentsatzen baitugu. Izan ere, pertsona orok, derrigortasunik gabe eta behar bezala informatuta, tratamendu jakin bat onartzen duen ala ez erabakitzeko eskubidea duelako”, esan du gaurko agerraldian elkarteko kide Elixabete Muruak.
