Eguzkik Lezo-Donibaneko bidegorriko lanen atzerapena salatu du
Mugikortasun Departamentuak Tourra aitzakia modura erabili duela diote ekologistek.
Lezo-Donibane bidegorriaren lanak Frantziako Tourra dela eta ez dira apirilean hasiko, uztailean baizik. Eguzki talde ekologistak salatu du Tourrarena “aitzakia” izan dela lanak berriro atzeratzeko, eta dagoeneko bost urteko atzerapena daramatela lan horiek.
Ekologistek diote Tourrak eragindako atzerapena “ez zaiola gaizki etorriko” Gipuzkoako Foru Aldundiko Mugikortasun Departamentuari; izan ere, Rafaela Romero diputatuak lanekin apirilean hasteko asmoa zuela adierazi zuen duela hilabete, “proiektua oraindik guztiz itxi gabe zegoela”. Gaineratu dute obrak oraindik esleitu behar direla, eta horregatik dio Eguzkik departamentuari ondo etorri zaiola atzerapena.
Nabarmendu dute, nolanahi ere, legealdia maiatzean bukatuko dela eta bidegorria amaitzeko lanak ez direla hasiko.
