Otsailetik aurrera, Elorsoroko bazkideek Gipuzkoa, Araba eta Bizkaiko beste 76 herritako kirolguneak ordaindu gabe erabili ahalko dituzte.
Olaia Lasa ongizate zinegotzia eta Enekoitz Markos kirol zinegotzia. 
Otsailaren 1ean Kirol Txartela Mugiment programarekin bat egingo du Oiartzungo Udalak. Hitzarmen berriari esker, Elorsoro kiroldegiko bazkideek Gipuzkoa, Araba eta Bizkaiko beste 76 herritako 132 kirol instalakuntza doan erabili ahalko dituzte.
Beste kiroldegiak erabili ahal izateko, mugikorrean KirolTxartela Mugiment aplikazioa deskargatu beharko dute lehenengo erabiltzaileek. Bertan ikusi ahalko dute zein kiroldegitara sar daitezkeen, eta bertara doan sartzeko aski izango da harreran aplikazioko txartel birtuala eta nortasun agiria erakustearekin.
Gaur-gaurkoz 72 udalerri daude sartuta Eusko Jaurlaritzak sustaturiko proiektuan; tartean Gipuzkoako hogei. Hil hau bukatzearekin batera gehituko da Oiartzun. “Horrela”, aintzatetsi dute udal arduradunek, “Oiartzungo bazkide batek Donostian lan egiten badu eta bazkaldu ondoren tarteren bat badu, edo astean zehar Bilbon ikasten ari bada, bertako kiroldegiak doan erabiltzeko aukera izango du”.
Herri bakoitzaren esku dago zehaztea beste kiroldegietako bazkideek zein instalakuntza eta zerbitzu erabil ditzaketen, eta zein ordutegitan. Aplikazioan bertan ikus daitezke bakoitzeko aukera eta xehetasunak, eta webgunean ere kontsulta daiteke informazio hori.
Oiartzuarren kasuan, adibidez, baimena izango dute Lezoko igerilekua astelehenetik ostiralera erabiltzeko, 07:30etik 09:00etara eta 12:00etatik 17:00etara. Kiroldegiko gihartze gela, frontoia, rokodromoa eta pista ere erabili ahalko dituzte astelehenetik ostiralera, 08:00etatik 09:30era, eta 12:00etatik 17:00etara.
Trukean, beste herrietako bazkideek Elorsoro erabiliko dute honako baldintza hauekin: igerilekua 07:00etatik 09:00etara eta gihartze gela eta rokodromoa 12:00etatik 17:00etara, astean zehar.
Oarsoaldeari buruzko kalitatezko informazioa eta gertukoa jaso nahi dudalako. Euskaraz bizi nahi dudalako eta hizkuntzaren biziberritzea bultzatu nahi dudalako. Herrigintza egin nahi dudalako. Oarsoaldeko euskarazko komunitatearen parte izan nahi dudalako. Oarsoaldeko herritarrok behar dugulako. Zure ekarpena behar dugu, babestu tokiko euskarazko komunikabidea.
