Lau udaltzain hautatzeko prozesuan izena eman daiteke
Hainbat betekizun izango dituzten lau ofizial plazarako oposizioa ireki dute. Herriko emakumeen izen-ematea bultzatuko da.
Udaltzainen %12 bakarrik da emakumea. Oiartzungo Udalak martxan du lau udaltzain berri hautatzeko oposizio prozesu propioa. Jakinarazi dutenez, dagoeneko aurkeztu daitezke parte-hartzeko eskaerak.
Udalak adierazi duenez, urteak daramate “udaltzaingo-eredu propioa” bultzatzen. Honako ezaugarriak ditu eredu horrek: “Hurbilekoa, herritarren zerbitzura dagoena eta auzotarrekin elkarlana oinarri duena, inplikatua, komunitarioa, eta euskalduna”.
Horregatik, Araba, Bizkaian eta Gipuzkoan udaltzainak hautatzeko prozesu orokorrak erabili beharrean, Oiartzungo Udalak egiten du deialdia.
Udaltzainen betebeharrak zeintzuk izango diren zerrendatu dituzte: Herritarrak laguntzea, argibideak eta arreta eskaintzea, auzotarrekin lan egitea, jendea babestea, bizikidetza bultzatzea eta espazio publikoak zaintzea.
“Hau dela eta”, jarraitu du udal erakundeak, “hautaketa prozesuan proba fisikoek baino (gai edo ez gai baloratuko dira), trebezia sozialek garrantzia handiagoa izango dute (elkarrizketekin eta test psikoteknikoekin baloratuko dira)”.
Baldintzak
Izena emateko hainbat baldintza bete beharko dira: gutxienez 18 urte izan behar dira, batxilergo edo goi-mailako beste edozein ikasketa baliokide eta B gidabaimena. Horrez gain, euskarako hirugarren Hizkuntza Eskakizuna egiaztatu beharko da; prozesuan azterketa egiteko aukera egongo da.
Aurreratu dutenez, udaberrian izango dira azterketak. Plaza lortzen ez duten hautagaiekin lan-poltsa osatuko dutela jakinarazi dute, etorkizunean udalak izan ditzakeen behar berrietarako.
Oinarri guztiak udalaren webgunean daude.
Oiartzungo emakumeei deia
Oiartzungo Udaltzaingoan emakume eta gizonen arteko arrakala nabarmena da: %12 bakarrik dira emakumeak. Horregatik, udalak alde hori txikitu nahi du.
Adibide bat jarri dute: indarkeria matxista kasuren bat gertatuko balitz, eraso egin dioten emakumea artatzen duen udaltzaina emakumezkoa izatea “garrantzitsua” dela azpimarratu dute.
Horregatik, plazetako bat emakumeei erreserbatu zaie. “Oposaketa baloratuko duen epaimahai ere parekidea izatea bermatuko da, genero ikuspegia prozesu osoan txertatu eta erabakigarria izan dadin”, gaineratu dute.
Udalaren esanetan, emakume askok ez dute izen ematen probak gainditzeko gai izango ez direlakoan. “Baina emakumeek emaitza onak lortzen dituzte parte hartzen dutenean. Gainera, badaude rolen banaketaren ondorioz emakumeek garatu dituzten hainbat gaitasun udaltzainen eguneroko lanean lagungarriak direnak: enpatia, komunikatzeko gaitasuna…”.
Beste lau lanpostu
Udaltzain agenteen prozesuaz gain, udalak irekita du betekizun anitzetarako lau ofizial hautatzeko prozesua: igeltseritzako bi, argiteriako bat eta ur zerbitzuko beste bat.
Oinarriak udalaren webgunean kontsulta daitezke, Iragarki Taulak atalean. Eskaera orriak udaletxean bertan edo egoitza elektronikotik aurkeztu daitezke.
