Hiru ikastetxe publikoek matrikulazio kanpaina aurkeztu dute
Otsailaren 13tik 24ra gauzatuko da Bizarain, Cristobal Gamon eta Koldo Mitxelenako matrikulazioa. Datozen egunetan ate irekien jardunaldiak egingo dira ikastetxeetan.
Errenteria-Oreretako hiru ikastetxe publikoek prest dute jada 2023-2024 ikasturterako ikasle berrien matrikulazioa, eta gaur goizean aurkeztu dute Merkatuzarren Itziar Ostolaza Hezkuntza zinegotziak, Pili Sesen Bizarain Ikastolako zuzendariak, Aitor Sarasua Cristobal Gamon Ikastetxeko zuzendariak eta Amaia Jauregi Koldo Mitxelena Herri Ikastetxeko zuzendariak. Matrikulazio kanpaina otsailaren 13tik 24ra gauzatuko da, biak barne, eta 2020 eta 2021 urteetan jaiotako haurrei zuzenduta dago.
Itziar Ostolazak adierazi du Errenteriako Udalak herriko hiru ikastetxe publikoak “babestu eta bide lagundu” nahi dituela prozesu horretan. Ostolazak, gainera, harro nabarmendu du Errenteria-Oreretak duen eskaintza publikoa, eta ikastetxe publikoen hiru ardatz azpimarratu ditu: euskara, aniztasuna eta berrikuntza.
“Euskararen biziberritze, biziraute eta normalizazio prozesuan ikastetxeek urte askotan egin dute lan. Aniztasunean hezteak duen balioaz ere oso jakitun dira, eta horren trataeraren eta lanketaren inguruan murgilduta daude. Azkenik, berrikuntzari dagokionez, kontzeptua osotasunean ulertuta, bizi garen gizarteak edo testuinguru berriak jartzen dizkigun erronka guztien aurrean etengabe egokitzearen bidean murgilduta daude, etengabe berritzen ari diren eskolak dira”, zehaztu du hezkuntza zinegotziak.
Zentroen jarduna bertatik bertara ezagutu ahal izateko, ate irekien jardunaldiak abiatu dituzte hiru ikastetxeek, eta bertan parte hartzeko deia luzatu diete guraso berri horiei. Hauexek dira ate irekien datak:
Bizarain Ikastola:
- Juan Crisostomo Arriaga kaleko Bizarain Txiki eraikinean.
- Otsailak 2, osteguna, 16:30ean euskaraz eta 17:45ean gaztelaniaz.
Cristobal Gamon:
- Sorgintxulo 6. zenbakiko eraikin nagusian.
- Ate irekiak: otsailaren 6tik 9ra aurretiko hitzorduarekin.
- Aurkezpen bilera: otsailak 10, 16:30ean.
Koldo Mitxelena:
- Hitzordua eskatuta: otsailaren 6tik 17ra.
- Presentzialki Olibet eta Markola eraikinetan, otsailaren 8an, 17:00etatik 18:30era.
Dena den, bisiten ordutegia bertan zehaztutakoa bada ere, hitzorduak beste egun batean ere har daitezkeela jakinarazi dute ikastetxeetako zuzendariek: “Bada egun horietan etorri ezin duen jendea. Interesa badute dei dezatela, moldatuko gara”.
Gutunak etxeetara
Beste urteetan egin bezala, herriko ikastetxeen informazioa jasotzen duen gutuna bidaliko da 2020 eta 2021 urteetan jaiotako eta Errenteria-Oreretan erroldatutako 427 haurren etxeetara.
Hezkuntza zinegotziak gogorarazi du matrikulatzeko garaian kontuan hartu beharreko irizpideen artean daudela hautatu beharreko hizkuntza eredua eta ikastetxearen kokapena: “Haurraren gizarteratzean eta herriaren garapenean gai horiek duten garrantziaz jakituz, Errenteriako Udalak matrikulatzeko adinean dauden haurren familiak animatu nahi ditu seme-alabak D ereduan eta Errenteriako ikastetxeetan matrikulatzera”.
